ശുദ്ധജലത്തിന്റെ അനിവാര്യതയും അതു നിലനിര്‍ത്താനുള്ള ജാഗ്രതയും എന്നത്തെക്കാളും ഓര്‍മിപ്പിച്ചുകൊണ്ട് ഇന്ന് ലോക ജലദിനംകൊണ്ടാടുമ്പോള്‍ അശങ്കകളാണ് ബാക്കി. എല്ലാവര്‍ക്കും ജലം എന്ന മുദ്രാവാക്യം ശക്തമാകുമ്പോഴും മനുഷ്യന്‍ അവന്റെ കുടിനീരിന്റെ കാര്യത്തില്‍ കുറ്റവാളിയാകുന്നുണ്ടോ. അടുത്ത തലമുറക്കാര്യംപോകട്ടെ ഇന്നത്തെ ജീവിതം പോലും ഓര്‍ക്കാതെ യാണ് നാം ജലസ്രോതസ് വറ്റിക്കുന്നതും ഉള്ളതു തന്നെ മലിനമാക്കുന്നതും.
ജലയാഘോഷവും ഭാവിയിലേക്കുള്ള ജലകരുതലുകളും ഇന്നത്തെ ദിവസം വിളിച്ചു പറയുമ്പോഴും അതെല്ലാം ശരിയാണെന്നും മഹത്താണെന്നും നാം അറിയുന്നുണ്ട്. മഹാപ്രളയത്തിലൂടെ ജലത്തിന്റെ സംഹാരവും ഇപ്പോള്‍ ഉരുകുന്ന ചൂടിലൂടെ ജലത്തിന്റെ അമൃതസമാനമായ ആവശ്യകതയും നാമറിയുന്നു. കുളങ്ങളും പുഴകളും മറ്റും ഇല്ലാതാകുമ്പോഴും നമ്മള്‍ അവയെക്കുറിച്ച് ആശങ്കപ്പെടാതെ കുപ്പിവെള്ളമുണ്ടെന്ന ആശ്വാസത്തിലാണ്! കനത്ത മഴയില്‍ ജലശേഖരണം നടത്താനോ നദികളുടെ എണ്ണം പറഞ്ഞ് അഭിമാനിക്കുമ്പോള്‍ അവയെ ഉപയോഗപ്പെടുത്താനോ നമുക്കു കഴിയുന്നില്ല.
മാലിന്യം ഒഴിഞ്ഞ പറമ്പില്‍മാത്രമല്ല എവിടേയും തള്ളാമെന്ന ധാരണയില്‍ ജലസ്രോതസുകളെപ്പോലും നമ്മള്‍ വെറുതെ വിടുന്നില്ല. ഇക്കഴിഞ്ഞ ദിവസങ്ങളിലും അതിനു മുന്‍പും ചത്തു കരക്കടിഞ്ഞും വലകളില്‍ പിടിക്കപ്പെട്ടതുമായ തിമിംഗലങ്ങളില്‍ കണ്ടത് കിലോക്കണക്കിന് പ്‌ളാസ്റ്റിക്കാണ്! നമ്മുടെ പുണ്യപ്പെട്ട നദികള്‍പോലും ഭീകരമായ കോളിഫോം ബാക്റ്റീരയകളുടെ താവളമാണ്. നിത്യേനെ കുടിക്കുന്ന ശുദ്ധജലമെന്ന അശുദ്ധജലത്തില്‍പോലും മലവിസര്‍ജ്യത്തിന്റെ അംശമുണ്ടെന്നത് ആരേയും ഞെട്ടിപ്പിക്കുന്നില്ലെന്നതാണ് വാസ്തവം .മിക്കവാറും നമ്മുടെ പുഴകളെല്ലാംതന്നെ ജീവജാലങ്ങള്‍ക്കു എന്നേ ഭീഷണിയായിക്കഴിഞ്ഞു.പുഴകളില്‍ മത്സ്യങ്ങള്‍ ചത്തുപൊങ്ങുന്നത് ഇന്നു വിസ്മയമല്ല. വികസനത്തിന്റെപേരില്‍ വളരുന്ന ഫാക്റ്ററികളില്‍ നിന്നും പുഴകളില്‍ തള്ളുന്ന മാരകമായ രാസവസ്തുക്കളുടെ ദാരുണമായ കഥകളെത്ര.
രാജ്യങ്ങള്‍ ഒന്നിച്ചുകൂടിയുണ്ടാകുന്ന ഉച്ചകോടികളില്‍ എന്നും ഉയര്‍ന്നു കേള്‍ക്കുന്നത് ജലസംരക്ഷണങ്ങളെക്കുറിച്ചുള്ള തീവ്രപരിപാടികളെക്കുറിച്ചാണ്.അത് അവിടെമാത്രമായി ഒതുങ്ങുകയും ചെയ്യുന്നു.നാളെ വരുന്നത് ജലയുദ്ധങ്ങലാണ്.മൂന്നാംലോക മഹായുധ്ധം ജലത്തിനുവേണ്ടിയായിരിക്കാമെന്നും പറയപ്പെടുന്നു. ഇപ്പോള്‍തന്നെ വിവിധ രാജ്യങ്ങളുടെ അതിര്‍ത്തികളില്‍ വെള്ളം സ്വന്തമാക്കാന്‍ രഹസ്യ അണക്കെട്ടുകള്‍ നിര്‍മിക്കുന്നുവെന്നത് പരസ്യമായ വാര്‍ത്തകളാണ്. ഏഴുപുഴകളും എണ്ണായിരം കുളങ്ങളും നിര്‍മിച്ച ഇന്ത്യയുടെ ജലമനുഷ്യന്‍ എന്ന തലക്കെട്ടില്‍ വലിയൊരു വാര്‍ത്തയുണ്ട്.എല്ലാവര്‍ക്കും ഇതുപോലെ ജലമനുഷ്യനാകാന്‍ കഴിയില്ലെങ്കിലും ജലത്തെ അറിയാന്‍ കഴിയും,പ്രാണനാണെന്നറിയാന്‍.
