അഹമ്മദാബാദ് : ഓണ്‍ലൈന്‍ ഗെയിമായ പബ്ജി കളിച്ചതിന് ഗുജറാത്തില്‍ പത്ത് പേര്‍ അറസ്റ്റിലായി. മാര്‍ച്ച് ആദ്യ വാരം സംസ്ഥാനത്ത് പബ്ജിക്ക് നിരോധനം ഏര്‍പ്പെടുത്തിയതാണ്. ഇത് വകവെയ്‌ക്കാതെ കളിച്ചവരെയാണ് പോലീസ് അറസ്റ്റ് ചെയ്തത്. ഇതില്‍ ആറുപേര്‍ കോളേജ് വിദ്യാര്‍ത്ഥികളാണ്.
അറസ്റ്റിലായവര്‍ക്ക് ജാമ്യം ലഭിക്കുമെന്നും ഉത്തരവ് പാലിക്കാത്തതിന് കോടതിയില്‍ വിചാരണ നേരിട്ടാല്‍ മതിയെന്നും പോലീസ് കമ്മീഷണര്‍ മനോജ് അഗര്‍വാള്‍ അറിയിച്ചു. പബ്ജിക്ക് നിരോധനം ഏര്‍പ്പെടുത്തിയതിനെ തുടര്‍ന്ന് ഇതുമായി ബന്ധപ്പെട്ട് നിലവില്‍ 12 കേസുകളാണ് രജിസ്റ്റര്‍ ചെയ്തത്.
കൂടാതെ നിരവധി പേരെ പിടികൂടുകയും ചെയ്‌തെങ്കിലും അവരുടെ അറസ്റ്റ് രേഖപ്പെടുത്തിയിട്ടില്ല. ഗുജറാത്തിന് പിന്നാലെ വഡോദരയിലും, ആനന്ദിലും പബ്ജി, മോമോ ഗെയിമുകള്‍ക്ക് നിരോധനം ഏര്‍പ്പെടുത്തിയിട്ടുണ്ട്. കുട്ടികള്‍ പബ്ജി കളിക്ക് അടിമകളാകുകയാണെന്നും, പഠനത്തേയും ഇത് ഗുരുതരമായി ബാധിക്കുന്നുണ്ടെന്ന വിലയിരുത്തലിലാണ് പബ്ജിക്ക് നിരോധനം ഏര്‍പ്പെടുത്തിയത്.
