പാരീസ്: ചരിത്രം കുറിച്ച തിരിച്ചുവരവില് സ്വപ്നതുല്യമായ വിജയം സ്വന്തമാക്കി ഒലെ ഗുണ്ണര് സോള്ഷ്യറിന്റെ മാഞ്ചസ്റ്റര് യുണൈറ്റഡ് ചാമ്പ്യന്സ് ലീഗിന്റെ ക്വാര്ട്ടര് ഫൈനലില് കടന്നു. ഫ്രാന്സിലെ പടക്കുതിരകളായ പാരീസ് സെന്റ് ജര്മയിന്സിനെ (പിഎസ്ജി) മുക്കിയാണ് യുണൈറ്റഡ് 2014 നു ശേഷം ചാമ്പ്യന്സ് ലീഗില് അവസാന എട്ട് ടീമുകളിലൊന്നായത്.
സ്വന്തം ഗ്രൗണ്ടില് നടന്ന ആദ്യപാദ പ്രീക്വാര്ട്ടറില് ഏകപക്ഷീയമായ രണ്ട് ഗോളുകള്ക്ക് തോറ്റ യുണൈറ്റഡ് പിഎസ്ജിയുടെ തട്ടകത്തില് നടന്ന രണ്ടാം പാദത്തില് ശക്തമായി തിരിച്ചുവരവിലൂടെ 3-1ന്റെ വിജയം സ്വന്തമാക്കി. രണ്ട് പാദങ്ങളിലുമായുള്ള മത്സരം 3-3ന് സമനിലയായി. പക്ഷെ പിഎസ്ജിയുടെ മണ്ണില് നേടിയ എവേ ഗോളിന്റെ മികവില് യുണൈറ്റഡ് ക്വാര്ട്ടറിലേക്ക് മാര്ച്ച് ചെയ്തു. ഇതാദ്യമായാണ് സ്വന്തം തട്ടകത്തില് രണ്ടോ അതിലധികമോ ഗോളുകള്ക്ക് തോറ്റ ഒരു ടീം ചാമ്പ്യന്സ് ലീഗിന്റെ നോക്കൗട്ടില് കടക്കുന്നത്.
റൊമേലു ലുകാകുവും മാര്കസ് റാഷ്ഫോഡുമാണ് യുണൈറ്റഡിന് അസാധ്യമെന്ന് തോന്നിച്ച അവിസ്മരണീയ വിജയം സമ്മാനിച്ചത്. രണ്ട്, മുപ്പത് മിനിറ്റുകളില് സ്കോര് ചെയ്ത് ലുകാകു ഇരട്ട ഗോളിനര്ഹനായി. റാഷ്ഫോഡാണ് നിര്ണായകമായ എവേ ഗോള് കുറിച്ചത്.
ഇഞ്ചുറി ടൈമില് പെനാല്റ്റിയിലൂടെയാണ് റാഷ്ഫോഡ് ലക്ഷ്യം കണ്ടത്. വാറിന്റെ (വീഡിയോ അസിസ്റ്റന്ഡ് റഫറി) സഹായത്തോടെയാണ് സ്ലോവേനിയന് റഫറി ഡാമിര് സ്കോമിന പെനാല്റ്റി അനുവദിച്ചത്. പിഎസ്ജി പ്രതിരോധ നിരക്കാരന് കിംപെംമ്പേയുടെ കൈകളില് പന്ത് തട്ടിയതാണ് പെനാല്റ്റിക്ക് കാരണമായത്്. പിഎസ്ജിയുടെ ഏകഗോള് യുവാന് ബെര്നാറ്റിന്റെ ബൂട്ടില് നിന്നാണ് പിറന്നത്. 12-ാം മിനിറ്റിലാണ് ബെര്നാറ്റ് ഗോളടിച്ചത്.
കോച്ച് ഒലെ ഗണ്ണറുടെ ശിക്ഷണത്തില് മാഞ്ചസ്റ്റര് യുണൈറ്റഡിന്റെ തുടര്ച്ചയായ ഒമ്പതാം എവേ വിജയമാണിത്. അതേസമയം പിഎസ്ജി ഇത് തുടര്ച്ചയായ മൂന്നാം തവണയാണ് ചാമ്പ്യന്സ് ലീഗിന്റെ ക്വാര്ട്ടര് കാണാതെ പുറത്താകുന്നത്. ഒരു വര്ഷം മുമ്പ് റയല് മാഡ്രിഡിനോടാണ് അവര് പ്രീ ക്വാര്ട്ടറില് തകര്ന്നത്. 2017ല് ബാഴ്സലോണയോട് നാണംകെട്ട തോല്വി ഏറ്റുവാങ്ങി.
ഓള്ഡ് ട്രാഫോര്ഡിലെ ആദ്യ പാദത്തില് കളം നിറഞ്ഞുകളിച്ച എംബാപ്പെ നിറം മങ്ങിയതാണ് പിഎസ്ജിയുടെ തോല്വിക്ക്് കാരണം. പരിക്കേറ്റ സൂപ്പര് സ്റ്റാര് നെയ്മറുടെ അഭാവവും അവരെ ബാധിച്ചു.സസ്പെന്ഷനിലായ പോള് പോഗ്ബയുള്പ്പെടെ ഒട്ടേറെ പ്രമുഖതാരങ്ങളെ കൂടാതെയാണ് മാഞ്ചസ്റ്റര് യുണൈറ്റഡ് കളിക്കളത്തിലിറങ്ങിയത്.
