ന്യൂദല്ഹി: കഴിഞ്ഞ നാലര വര്ഷത്തിനിടയില് 5000 ജന് ഔഷധി കേന്ദ്രങ്ങള് ആരംഭിച്ചതായി പ്രധാനമന്ത്രി നരേന്ദ്ര മോദി. ജന്ഔഷധി പരിയോജനയുടെ ഗുണഭോക്താക്കളുമായും, ജന് ഔഷധി കേന്ദ്രങ്ങളുടെ ഉടമകളുമായും വീഡിയോ കോണ്ഫറന്സിങ്ങിലൂടെ സംവദിക്കുകയായിരുന്നു മോദി. ജനറിക് മരുന്നുകളുടെ ഉപയോഗത്തെക്കുറിച്ച് അവബോധം സൃഷ്ടിക്കാന് 2019 മാര്ച്ച് ഏഴ് ജന്ഔഷധി ദിവസ് ആയി ആചരിക്കാന് കേന്ദ്രം തീരുമാനിച്ചിരുന്നു.
850 അവശ്യ മരുന്നുകള്, ഹൃദ്രോഗ സ്റ്റെന്റുകള്, കാല്മുട്ട് ശസ്ത്രക്രിയയ്ക്ക് ആവശ്യമായ സാമഗ്രികള് എന്നിവയ്ക്ക് വില നിയന്ത്രണം ഏര്പ്പെടുത്തിയതായി പ്രധാനമന്ത്രി പറഞ്ഞു. കമ്പോള വിലയേക്കാള് 50 മുതല് 90 ശതമാനം വരെ കുറഞ്ഞ വിലയ്ക്കാണ് ജന് ഔഷധി കേന്ദ്രങ്ങളിലൂടെ മരുന്നുകള് ലഭിക്കുന്നത്, പ്രധാനമന്ത്രി ചൂണ്ടിക്കാട്ടി.
