ന്യൂദല്ഹി: വ്യോമാക്രമണം ചെറുക്കുന്നതിനിടെ പാക്കിസ്ഥാന്റെ പിടിയിലായ വിംഗ് കമാന്ഡര് അഭിനന്ദന് വര്ദ്ധമാന് ലാഹോറിലേക്ക് തിരിച്ചു. 2.30 ന് ലാഹോറിലെത്തുന്ന ഇദ്ദേഹത്തെ അവിടെനിന്നും വാഗാ അതിര്ത്തിയിലേക്ക് എത്തിക്കും. അഭിനന്ദന്റെ മാതാപിതാക്കള് വാഗാ അതിര്ത്തിയില് സ്വീകരിക്കാനായി കാത്തുനില്ക്കും. ധീരപോരാളിയെ വരവേല്ക്കാന് ഒരുങ്ങിയിരിക്കുകയാണ് രാജ്യം. വന് വരവേല്പ്പാവും വാഗാ അതിര്ത്തിയില് അഭിനന്ദിനായി നടത്തുക.
റാവല്പിണ്ടിയില് നിന്ന് ലാഹോറിലെത്തിച്ച ശേഷം ജനീവ ഉടമ്പടി പ്രകാരം ആദ്യം അന്താരാഷ്ട്ര റെഡ് ക്രോസ് കമ്മറ്റിയ്ക്ക് കൈമാറും. പഞ്ചാബ് മുഖ്യമന്ത്രി അമരീന്ദര് സിംഗാണ് അട്ടാരി അതിര്ത്തിയിലെത്തി അഭിനന്ദനെ സ്വീകരിക്കുക. പിന്നീട് ഉച്ചക്ക് 12നും 2നും ഇടയില് ഇന്ത്യയിലേക്ക് മടങ്ങാനും സാധിക്കും. ഇന്ത്യയിലെത്തിയ ശേഷം വര്ദ്ധമാന് പ്രതിരോധ- സുരക്ഷാ ഉദ്യോഗസ്ഥരോട് കാര്യങ്ങള് വിശദീകരിക്കും.നിയന്ത്രണ രേഖയില് ഇന്ത്യയിലേക്ക് കടന്ന പാക് വിമാനത്തെ തുരത്തുന്നതിനിടെയാണ് മിഗ് 21 വിമാനം വെടിവെച്ചിട്ട പാകിസ്താന് ഇന്ത്യന് വ്യോമസേന പൈലറ്റിനെ പിടികൂടുന്നത്.
അഭിനന്ദിനെ വരവേല്ക്കാന് കുടംബവും ഇന്ന് അതിര്ത്തിയില് എത്തും. അഭിനന്ദന് വര്ദ്ധമാനെ വിട്ടയ്ക്കാനുള്ള പാക്കിസ്ഥാന്റെ തീരുമാനം സ്വാഗതാര്ഹമെന്ന് യുണൈറ്റഡ് നേഷന്സ്. യുഎന് ചീഫ് ആന്റോണിയോ ഗുട്ടെറസിന്റെ വക്താവ് സ്റ്റീഫന് ഡുജാറിക്കാണ് വിഷയത്തില് യുഎന് പ്രതികരണം അറിയിച്ചത്.
ഇന്ത്യയും പാക്കിസ്ഥാനും തമ്മിലുള്ള പ്രശ്നങ്ങള് പരിഹരിക്കപ്പെടണമെന്ന് യുഎന്നും രാജ്യാന്തര സമൂഹവും എത്രമാത്രം ആഗ്രഹിക്കുന്നുവെന്ന് വ്യക്തമാക്കിയാണ് യുഎന് പ്രതികരണം നടത്തിയത്. യുഎന് സെക്രട്ടറി ജനറല് ഇന്ത്യയുടെയും പാക്കിസ്ഥാന്റെയും പ്രധാനമന്ത്രിമാരോട് സംസാരിച്ചോ എന്ന ചോദ്യത്തിന് രണ്ട് രാജ്യങ്ങളുമായി പല തലങ്ങളില് ബന്ധപ്പെട്ടെന്നും യുഎന് വ്യക്തമാക്കി.
പ്രദേശത്ത് സമാധാനം ഉറപ്പാക്കാന് ഇരു രാജ്യങ്ങളും എത്രയും വേഗം പരസ്പരധാരണകളോടെ നീക്കങ്ങള് നടത്തണമെന്നും അദ്ദേഹം ആവശ്യപ്പെട്ടു.
