ലണ്ടന്: യുവേഫ ചാമ്പ്യന്സ് ലീഗില് ഗോളില്ലാക്കളി. ഇന്നലെ നടന്ന രണ്ട് ആദ്യപാദ പ്രീ ക്വാര്ട്ടറും സമനിലയില് കലാശിച്ചു. ലിവര്പൂളിനെ ബയേണ് മ്യുണിക്കും ബാഴ്സലോണയെ ലിയോണുമാണ് പിടിച്ചുകെട്ടിയത്.
ഫ്രഞ്ച് ക്ലബ് ലിയോണിന്റെ തട്ടകത്തില് നടന്ന മത്സരത്തില് ബാഴ്സലോണക്കായിരുന്നു ആധിപത്യം. എന്നാല് മെസ്സിയും സുവാരസും അടങ്ങുന്ന താരനിരക്ക് ഒരിക്കല് പോലും ലക്ഷ്യം കാണാന് കഴിഞ്ഞില്ല. ഗോള്കീപ്പര് ആന്റണി ലോപ്പസിന്റെ മിന്നുന്ന പ്രകടനമാണ് മെസ്സിപ്പടയെ ഗോളടിക്കുന്നതില് നിന്ന് തടഞ്ഞുനിര്ത്തിയത്. കളിയുടെ 63 ശതമാനവും പന്ത് കൈവശംവെച്ച ബാഴ്സ ആകെ പായിച്ചത് 25 ഷോട്ടുകള്. ഇതില് അഞ്ചെണ്ണം ഓണ് ടാര്ഗറ്റിലേക്കായിരുന്നെങ്കിലും ഒരെണ്ണം പോലുംവലയിലെത്തിക്കാന് മെസ്സി-സുവാരസ്-ഡെംബലെ സഖ്യത്തിന് കഴിഞ്ഞില്ല. ആകെ വിവിധ ടൂര്ണമെന്റുകളിലായ കഴിഞ്ഞ അഞ്ചു മല്സരങ്ങളില് ബാര്സയുടെ നാലാം സമനിലയാണിത്. മാര്ച്ച് 13ന് ബാര്സയുടെ തട്ടകമായ നൗകാമ്പിലാണ് രണ്ടാം പാദം.
ലണ്ടനിലെ ആന്ഫീല്ഡ് സ്റ്റേഡിയത്തില് നടന്ന പോരാട്ടത്തില് ബയേണ് മ്യൂണിക്കാണ് കരുത്തരായ ലിവര്പൂളിനെ ഗോള്രഹിത സമനിയില് പിടിച്ചുകെട്ടിയത്. മൂന്നാം തവണയാണ് ബയേണ് ആന്ഫീല്ഡില് സമനില കൊണ്ട് തൃപ്തരാവുന്നത്.
മത്സരത്തില് പന്ത് കൈവശം വെക്കുന്നതില് നേരിയ മുന്തൂക്കം ബയേണിനായിരുന്നു. എന്നാല് ഗോള്വല ലക്ഷ്യമാക്കി ഷോട്ടുകളുതിര്ക്കുന്നതില് ലിവര്പൂളിനായിരുന്നു മേല്ക്കൈ. എങ്കിലും സാദിയോ മാനെ-ഫിര്മീനോ-മുഹമ്മദ് സല ത്രയത്തിന് ബയേണ് ഗോളി മാനുവല് ന്യുയറെ കീഴടക്കാന് കഴിഞ്ഞില്ല. ഒപ്പം കരുത്ത പ്രതിരോധവും ബയേണ് ലിവര്പൂള് സ്ട്രൈക്കര്മാര്ക്കായി ഒരുക്കിയിരുന്നു. ഫ്രാങ്ക് റിബറി, റോബന് തുടങ്ങിയ സൂപ്പര്താരങ്ങള് ഇല്ലാതെയാണ് ബയേണ് കളിക്കാനിറങ്ങിയത്. റിബറി 81-ാം മിനിറ്റില് പകരക്കാരനായി കളത്തിലെത്തിയെങ്കിലും കാര്യമുണ്ടായില്ല. കളി സമനിയില് പിരിഞ്ഞതോടെ സ്വന്തം തട്ടകത്തില് ജര്മന് ക്ലബ്ബുകളോട് തോറ്റിട്ടില്ല എന്ന റെക്കോഡ് നിലനിര്ത്താനും ലിവര്പൂളിനായി.
ബയറണിന്റെ ഹോം ഗ്രൗണ്ടായ അലയന്സ് അരീനയില് മാര്ച്ച് 13നാണ് രണ്ടാംപാദ മത്സരം. ഈ മത്സരത്തില് പ്രതിരോധനിരതാരം ജോഷ്വ കിമ്മിച്ചിന് കളിക്കാനാവില്ല എന്നത് ബയേണിന് തിരിച്ചടിയാകും.
