ബാര്ബഡോസ്: ഇംഗ്ലണ്ടിലും വെയ്ല്സിലുമായി ഈ വര്ഷം നടക്കുന്ന ലോകകപ്പിനുശേഷം ഏകദിന ക്രിക്കറ്റില് നിന്ന്് വിരമിക്കുമെന്ന് വെസ്റ്റ് ഇന്ഡീസിന്റെ സ്റ്റാര് ബാറ്റ്സ്മാന് ക്രിസ് ഗെയില്. ഇംഗ്ലണ്ടിനെതിരായ ഏകദിന പരമ്പരയ്ക്കുള്ള പരിശീലനത്തിനിടെയാണ് ഗെയില് വിടവാങ്ങല് പ്രഖ്യാപിച്ചത്.
ഇംഗ്ലണ്ടിനെതിരായ ആദ്യ രണ്ട് ഏകദിനങ്ങള്ക്കുള്ള വിന്ഡീസ് ടീമില് ഗെയില് സ്ഥാനം പിടിച്ചിട്ടുണ്ട്. മുപ്പത്തിയൊന്പതുകാരനായ ഈ ഇടംകൈയന് ബാറ്റ്സ്മാന് 284 ഏകദിനങ്ങള് കളിച്ചിട്ടുണ്ട്. 23 മൂന്ന് സെഞ്ചുറിയും 49 അര്ധ സെഞ്ചുറികളും അടക്കം 9727 റണ്സ് നേടിയിട്ടുണ്ട്. 37.12 ആണ് ബാറ്റിങ് ശരാശരി.
2015 ലെ ലോകകപ്പില് കാന്ബറയില് സിംബാബ്വെക്കെതിരെ കുറിച്ച 215 റണ്സാണ് ഏറ്റവും ഉയര്ന്ന സ്കോര്. ലോകകപ്പിലെ ആദ്യ ഇരട്ട സെഞ്ചുറിയാണിത്. ഈ മത്സരത്തില് മെര്ലോണ് സാമുവല്സിനൊപ്പം പടുത്തുയര്ത്തിയ 372 റണ്സ് ലോകകപ്പ് ചരിത്രത്തിലെ ഏറ്റവും വലിയ കൂട്ടുകെട്ടാണ്.
ടെസ്റ്റില് ട്രിപ്പിള് സെഞ്ചുറിയും ഏകദിനത്തില് ഇരട്ട സെഞ്ചുറിയും ട്വന്റി 20 യില് സെഞ്ചുറിയും നേടിയ ലോകത്തെ ഏക ബാറ്റ്സ്മാനാണ് ഗെയില്.
103 ടെസ്റ്റും 56 ട്വന്റി 20 മത്സരങ്ങളും കളിച്ചിട്ടുണ്ട്. 2006 ലെ ചാമ്പ്യന്സ് ട്രോഫിയില് ടൂര്ണമെന്റിന്റെ താരമായി. ഈ ടൂര്ണമെന്റിലെ എട്ട് മത്സരങ്ങളില് മൂന്ന് സെഞ്ചുറിയടക്കം 474 റണ്സ് നേടി. എട്ട് വിക്കറ്റും സ്വന്തമാക്കി.
ഇംഗ്ലണ്ടിനെതിരെ നാളെ നടക്കുന്ന ആദ്യ ഏകദിനത്തില് ഗെയില് കളിക്കും. കഴിഞ്ഞ ജൂലൈക്കുശേഷം താരത്തിന്റെ ആദ്യ രാജ്യാന്തര മത്സരമാണിത്.
