കൊല്ലം: വിശ്വാസങ്ങളെയും ആചാരങ്ങളെയും പരമോന്നത നീതി പീഠത്തിന് മുന്നില് തള്ളിപ്പറഞ്ഞ തിരുവിതാംകൂര് ദേവസ്വം ബോര്ഡിനെതിരെ പ്രതിഷേധം ശക്തമായ സാഹചര്യത്തില് ഓഫീസുകള്ക്ക് സുരക്ഷയൊരുക്കണമെന്ന് ആവശ്യപ്പെട്ട് ബോര്ഡ് പ്രസിഡന്റ് ഡിജിപിക്ക് കത്തയച്ചു. പ്രസിഡന്റും മറ്റ് അംഗങ്ങളും പങ്കെടുക്കുന്ന അടിയന്തര പരിപാടികളിലും സുരക്ഷയൊരുക്കണമെന്നും കത്തില് ആവശ്യപ്പെട്ടിട്ടുണ്ട്.
സുരക്ഷയുടെ പേരില് സമാധാനപരമായി നടക്കുന്ന ഭക്തജന പ്രതിഷേധം അടിച്ചമര്ത്തുകയാണ് ബോര്ഡിന്റെ ലക്ഷ്യം. ഉത്സവകാലമായതിനാല് വിവിധ ക്ഷേത്രങ്ങളിലടക്കം നിശ്ചയിച്ചിരുന്ന മറ്റ് ഔദ്യോഗിക പരിപാടികളില് ഭൂരിഭാഗവും പ്രസിഡന്റും അംഗങ്ങളും റദ്ദാക്കിയിട്ടുണ്ട്. കോടതിയിലെ നിലപാടുകള്ക്ക് പുറമെ ആര്ത്തവ അവധി ദിവസം വെട്ടിക്കുറച്ച നടപടിയിലും ഭക്തജനങ്ങള്ക്ക് വലിയ പ്രതിഷേധമുണ്ട്.
ഭക്തജന പ്രതിഷേധം കണക്കിലെടുത്ത് ശബരിമലയിലെ കുംഭമാസപൂജകള്ക്കും വന് സന്നാഹം ഒരുക്കണമെന്നും കത്തില് ആവശ്യപ്പെടുന്നുണ്ട്. കഴിഞ്ഞ മാസപൂജകള്ക്കും തീര്ഥാടനകാലവും ഭക്തരെ വേട്ടയാടിയ പോലീസ് നടപടി വീണ്ടും ആവശ്യപ്പെടുന്ന നിലപാടാണ് ദേവസ്വം ബോര്ഡ് ഇപ്പോഴും സ്വീകരിച്ചിട്ടുള്ളത്. എന്നാല് സുരക്ഷയുടെ കാര്യത്തില് ഉന്നതതല യോഗം കൂടി തീരുമാനമെടുക്കണമെന്ന് നിര്ദേശം ആഭ്യന്തര വകുപ്പ് ഡിജിപിക്ക് ഉത്തരവിട്ടിരുന്നു.
മാസപൂജയ്ക്ക് നടതുറന്നാല് ദര്ശനത്തിനെത്തുമെന്ന് ആക്ടിവിസ്റ്റുകളായ യുവതികളും പരസ്യമാക്കിയിട്ടുണ്ട്. ഈ സാഹചര്യത്തില് ഭക്തജനങ്ങളെ അടിച്ചമര്ത്താന് വന്പോലീസ് സന്നാഹമാകും ഈ മാസവും ഉണ്ടാകുക.
