തിരുവനന്തപുരം: എന്ഡോസള്ഫാന് സമരസമിതി നേതാക്കള് സര്ക്കാരുമായി നടത്തിയ ചര്ച്ച പരാജയപ്പെട്ടു. സര്ക്കാര് കണക്കിലുള്ള 6212 ദുരിത ബാധിതര്ക്കും ധനസഹായമായി ഇതുവരെ 184 കോടി രൂപ ചെലവഴിച്ചെന്ന് റവന്യൂ വകുപ്പ് വ്യക്തമാക്കി. സുപ്രീംകോടതി വിധി പ്രകാരം ധനസഹായത്തിന്റെ മൂന്ന് ഗഡുക്കളും നല്കി. ഈ സാഹചര്യത്തില് സമരത്തില് നിന്ന് പിന്മാറണമെന്നാണ് സര്ക്കാര് ആവശ്യപ്പെട്ടത്. എന്നാല് സര്ക്കാര് ഒരു വര്ഷം മുമ്പ് നല്കിയ വാഗ്ദാനങ്ങള് പൂര്ണമായി നടപ്പിലായില്ലെന്ന് സമര സമിതി നേതാക്കള് വ്യക്തമാക്കി.
ദുരിതബാധിതര് സെക്രട്ടേറിയറ്റിന് മുന്നില് നടത്തി വരുന്ന സമരം തുടരുമെന്നും സമരം ശക്തമായി മുന്നോട്ട് കൊണ്ടുപോകുമെന്നും സമരസമിതി വ്യക്തമാക്കി. ഇന്ന് 11 മണിക്ക് റവന്യൂ മന്ത്രി ഇ ചന്ദ്രശേഖരനും ആരോഗ്യ മന്ത്രി കെ കെ ശൈലജയുമാണ് സമരസമിതിയുമായി ചര്ച്ച നടത്തിയത്. സമരം ശക്തമാക്കുന്നതിന്റെ ഭാഗമായി ഞായറാഴ്ച മുഖ്യമന്ത്രിയുടെ വസതിയിലേക്ക് സങ്കട യാത്ര നടത്തുമെന്നും ഇരകളെ നിശ്ചയിക്കുന്നതില് അതിര്ത്തികള് ബാധകമാക്കരുതെന്നും സമിതി പറഞ്ഞു.
തിരുവനന്തപുരം സെക്രട്ടേറിയേറ്റിന് മുന്നിലെ എന്ഡോസള്ഫാന് ദുരിത ബാധിതരുടെ കുടുംബത്തിന്റെ പട്ടിണിസമരം മൂന്നാം ദിനത്തിലേക്ക് കടന്നിരിക്കുകയാണ്. സഹായത്തിന് അര്ഹരായവരെ പട്ടികയില് ഉള്പ്പെടുത്തുകയും ചികിത്സ ഉറപ്പാക്കുകയും ചെയ്യുന്നത് വരെ സമരം തുടരാനാണ് സമരസമിതിയുടെ തീരുമാനം.
