ന്യൂദൽഹി : ഡിജിപി നിയമനത്തിൽ ഇളവ് അനുവദിക്കണം എന്ന കേരളത്തിന്റെ ആവശ്യം സുപ്രീം കോടതി തള്ളി. പോലീസ് മേധാവിയെ നിയമിക്കാനുള്ള സംസ്ഥാനങ്ങളുടെ അധികാരങ്ങൾക്ക് നിയന്ത്രണം ഏർപ്പെടുത്തിയ വിധിയിൽ ഭേദഗതി ആണ് കേരളം ആവശ്യപ്പെട്ടത്.
യുപിഎസ്സി തയ്യാറാക്കുന്ന പാനലിൽ നിന്ന് ഒരാളെ സംസ്ഥാന പോലീസ് മേധാവി ആയി നിയമിക്കണം എന്ന ഉത്തരവിൽ നിന്ന് സംസ്ഥാനത്തെ ഒഴിവാക്കണം എന്നായിരുന്നു കേരളത്തിന്റെ ആവശ്യം. 2011 ൽ നിയമസഭാ പാസ്സാക്കിയ കേരള പോലീസ് ആക്ടിലെ വ്യവസ്ഥകൾ പ്രകാരം സംസ്ഥാന പോലീസ് മേധാവിയെ നിയമിക്കാൻ അനുവദിക്കണം എന്നും കേരളം ആവശ്യപ്പെട്ടിരുന്നു.
2018 ജൂലൈയിലാണ് പോലീസ്മേധാവിയെ നിയമിക്കാനുള്ള സംസ്ഥാനങ്ങളുടെ അധികാരങ്ങൾക്ക് സുപ്രീംകോടതി നിയന്ത്രണം ഏർപ്പെടുത്തിയത്. സംസ്ഥാനങ്ങൾക്ക് ഇഷ്ടമുള്ളയാളെ നേരിട്ട് ഡിജിപി ആയി നിയമിക്കുന്നതിനു പകരം യോഗ്യരായ ഉദ്യോഗസ്ഥരുടെ പട്ടിക യൂണിയൻ പബ്ലിക് സർവീസ് കമ്മിഷന് അയക്കാൻ ആയിരുന്നു നിർദേശം. സീനിയോറിറ്റി, മെറിറ്റ്, കഴിവ് എന്നിവയുടെ അടിസ്ഥാനത്തിൽ മൂന്ന് പേരുടെ പാനൽ തയ്യാറാക്കി യുപിഎസ്സി സംസ്ഥാന സർക്കാരുകൾക്ക് കൈമാറണം. ഈ പാനലിൽ നിന്ന് സംസ്ഥാന സർക്കാരുകൾക്ക് ഇഷ്ടമുള്ള ഉദ്യോഗസ്ഥനെ തെരഞ്ഞെടുക്കാം എന്നായിരുന്നു സുപ്രീം കോടതി ഉത്തരവ്.
