സന്നിധാനം: വേഷ പ്രച്ഛന്നയായി പതിനെട്ടാം പടി ചവിട്ടി ശബരിമലയില്‍ ദര്‍ശനം നടത്തിയെന്ന അവകാശ വാദവുമായി കൊല്ലം സ്വദേശിനിയും മുന്‍ മാര്‍ക്‌സിസ്റ്റ്-കോണ്‍ഗ്രസ്സ് പ്രവര്‍ത്തകയും ആക്ടിവിസ്റ്റുമായ എസ്.പി. മഞ്ജു. ചൊവ്വാഴ്ച രാവിലെ 7.30 ന് സന്നിധാനത്തെത്തി ദര്‍ശനം നടത്തിയെന്നാണ് അവകാശവാദം. ഇതുസംബന്ധിച്ച മൂന്ന് വീഡിയോ ദൃശ്യങ്ങള്‍ ഫേസ്ബുക്കിലൂടെ പുറത്തുവന്നിട്ടുണ്ട്. എന്നാല്‍, ദേവസ്വംബോര്‍ഡും പോലീസും സംഭവം സ്ഥിരീകരിച്ചിട്ടില്ല.
ആക്ടിവിസ്ടുകളുടെ ഫേസ്ബുക്ക് കൂട്ടായ്‌മയായ ‘നവോത്ഥാന കേരളം ശബരിമലയിലേക്ക്’ എന്ന പേജിലൂടെയാണ് മുപ്പത്താറുകാരി മഞ്ജു ദര്‍ശനം നടത്തിയെന്ന വീഡിയോ പുറത്ത് വിട്ടത്. വൃദ്ധയുടെ വേഷത്തില്‍ മാളികപ്പുറം ഫ്‌ളൈ ഓവറില്‍ നില്‍കുന്ന ദൃശ്യങ്ങളും മാളികപ്പുറത്തേക്ക് പ്രവേശിക്കുന്ന ദൃശ്യങ്ങളുമാണ് പുറത്ത് വിട്ടിരിക്കുന്നത്. കൈയിലും നെറ്റിയിലും ഭസ്മം പൂശിയിട്ടുണ്ട്. പതിനെട്ടാംപടി കയറിയെന്നും രണ്ട് മണിക്കൂറോളം സന്നിധാനത്ത് തങ്ങിയശേഷമാണ് മലയിറങ്ങിയതെന്നും മഞ്ജു വീഡിയോയില്‍ പറയുന്നു. ചിത്തിര ആട്ട വിശേഷത്തിന് മലകയറാന്‍ എത്തിയെങ്കിലും പ്രതിഷേധത്തെ തുടര്‍ന്ന് ഇവര്‍ മടങ്ങിയിരുന്നു.
വൃദ്ധയുടെ വേഷം ആയതിനാല്‍ ഭക്തര്‍ തടയുകയോ പ്രതിഷേധിക്കുകയോ ചെയ്തിരുന്നില്ലെന്നാണ് സൂചന. അയ്യപ്പ സേവാ സംഘത്തിലെ പ്രവര്‍ത്തകര്‍ ഇവര്‍ക്ക് നെയ്യഭിഷേകത്തിനുള്ള സൗകര്യം ഒരുക്കി നല്‍കിയെന്ന് വീഡിയോയില്‍ പറഞ്ഞിരിക്കുന്നു. ഇത് അയ്യപ്പ സേവാ സംഘം നിഷേധിച്ചിട്ടുണ്ട്. അത്തരത്തില്‍ ഒരാള്‍ തങ്ങളെ സമീപിച്ചിട്ടില്ലെന്നും അയ്യപ്പസേവാസംഘത്തെ അപമാനിക്കാനുള്ള ശ്രമമാണ് നടത്തുന്നതെന്നും സേവാസംഘം ചുമതലയിലുള്ള പി. ബാലന്‍ പറഞ്ഞു.
