കോട്ടയം: തീവ്ര, നക്സലൈറ്റ് പശ്ചാത്തലമുള്ള ആക്ടിവിസ്റ്റുകള് ഉള്പ്പെടുന്ന സംഘം ക്ഷേത്രാചാരങ്ങളുടെയും പൂജാവിധികളുടെയും ആധികാരിക ഗ്രന്ഥമായ തന്ത്രസമുച്ചയം കത്തിക്കാന് തയാറെടുക്കുന്നു. ജനുവരി 14ന് കോട്ടയത്ത് ബ്രാഹ്മണ്യവിരുദ്ധ-ജാതിവിരുദ്ധ സമരമെന്നപേരില് നടക്കുന്ന സമ്മേളനത്തില് പ്രതീകാത്മകമായി കത്തിക്കാനാണ് പരിപാടി.
ദേശീയ തലത്തിലുള്ള സാംസ്കാരിക നേതാക്കള് പങ്കെടുക്കുമെന്നാണ് സംഘാടകര് കഴിഞ്ഞ ദിവസം വാര്ത്താസമ്മേളനത്തില് അവകാശപ്പെട്ടത്. ഭൂ അധികാര സംരക്ഷണ സമിതി ചെയര്മാന് സണ്ണി എം. കപിക്കാട്, ശബരിമല ആദിവാസി അവകാശ പുനഃസ്ഥാപന സമിതി കണ്വീനര് എം. ഗീതാനന്ദന് തുടങ്ങിയവരാണ് ഇതിനു പിന്നില്. ശബരിമലയില് യുവതികള് ദര്ശനം നടത്തിയതിനെ തുടര്ന്ന് തന്ത്രി ശുദ്ധികലശം നടത്തിയതാണ് ഇവരെ പ്രകോപിപ്പിച്ചത്.
തന്ത്ര സമുച്ചയം കത്തിക്കുമെന്നുള്ള പ്രഖ്യാപനം സാമുദായിക സംഘര്ഷം ലക്ഷ്യമാക്കിയാണെന്ന് പട്ടികജാതിമോര്ച്ച ജില്ലാ കമ്മിറ്റി കുറ്റപ്പെടുത്തി. ഹിന്ദു സമൂഹത്തിന്റെ ഭാഗമായ ആദിവാസി സമൂഹത്തെ പ്രലോഭിപ്പിച്ച് ദേശവിരുദ്ധരും ഹൈന്ദവ വിരുദ്ധരുമാക്കിത്തീര്ക്കുന്നതിനുള്ള ശ്രമം വിഘടനവാദപരവും രാജ്യദ്രോഹപരവുമാണെന്ന് യോഗം അഭിപ്രായപ്പെട്ടു.
ആദിവാസി ഭൂനിയമം കൈയേറ്റക്കാര്ക്കായി അട്ടിമറിച്ച് ആദിവാസികള്ക്ക് പകരം ഭൂമിവാദം ഉന്നയിച്ച് സര്ക്കാരിനെ കൊണ്ട് അംഗീകരിപ്പിച്ചവരാണ് ഇക്കൂട്ടര്. ഭൂമിപ്രശ്നം കയ്യൊഴിഞ്ഞ ഇവര് ശബരിമലയെ തകര്ക്കാനാണ് ശ്രമിക്കുന്നത്. ഇവരുടെ ഉപജാപങ്ങളില് ആരും വീണ് പോകരുതെന്നും യോഗം ആവശ്യപ്പെട്ടു. ജില്ലാ ജനറല് സെക്രട്ടറി കെ.ആര്. പ്രദീപ് അദ്ധ്യക്ഷനായി. സംസ്ഥാന വൈസ് പ്രസിഡന്റ് കെ.കെ. ശശിധരന് ഉദ്ഘാടനം ചെയ്തു. സംസ്ഥാന വൈസ് പ്രസിഡന്റ് രമേശ് കാവിമറ്റം, ജില്ലാ സെക്രട്ടറി ദിലീപ് മാരാംകുന്നേല്, ട്രഷറര് വിനീഷ് വെള്ളൂര്, രാധാമണി, സുകുമാരന്, കുഞ്ഞുമോന് ഏറ്റുമാനൂര് എന്നിവര് പ്രസംഗിച്ചു.
