ഹൈദരാബാദ്: ശബരിമലയില് ഇരുളിന്റെ മറവില് യുവതികളെ എത്തിച്ച നടപടി ഭീരുത്വമാണെന്ന് ഐഎസ്ആര്ഒ മുന് ചെയര്മാന് ജി. മാധവന് നായര്. പാതിരാത്രിയില് ആര്ക്കുവേണമെങ്കിലും ഇതുപോലെ പ്രവര്ത്തിക്കാന് സാധിക്കുമെന്നും എന്നാല് ഇത് ഭീരുത്വമാണെന്നും അദ്ദേഹം പറഞ്ഞു.
അതേസമയം ശബരിമലയിലെ സ്ത്രീ പ്രവേശനം സംസ്ഥാനത്തെ രാഷ്ട്രീയ അജണ്ടയാണെന്നും അദ്ദേഹം കുറ്റപ്പെടുത്തി. വാര്ത്താ ഏജന്സിയായ പിടിഐയോട് സംസാരിക്കുകയായിരുന്നു അദ്ദേഹം. സിഖുകാര്ക്കും, ക്രിസ്ത്യാനികള്ക്കും മുസ്ലിങ്ങള്ക്കും അവരുടേതായ ആചാര അനുഷ്ഠാനങ്ങള് ഉണ്ട്. അതില് സര്ക്കാരോ കോടതിയോ ഇടപെടുന്നുണ്ടോ. പിന്നെന്തേ ഹിന്ദു സമുദായത്തെ മാത്രം ലക്ഷ്യമിടുന്നതെന്നും മാധവന് നായര് ചോദിച്ചു.
കേരളക്കരയെ നാശത്തിലാഴ്ത്തിയ പ്രളയത്തിന്റെ പുനര്നിര്മാണ പ്രവര്ത്തനങ്ങള്ക്ക് പ്രാധാന്യം നല്കേണ്ട സര്ക്കാരാണ് ശബരിമല വിഷയത്തില് വെറുതേ ഊര്ജ്ജം പാഴാക്കുന്നത്. പ്രളയാനന്തരം വലിയ നാശനഷ്ടങ്ങളാണ് സംസ്ഥാനത്ത് ഉണ്ടായത്. എന്നാല് അവ പരിഹരിക്കുന്ന പ്രവര്ത്തനങ്ങള് ഒച്ച് ഇഴയുന്ന വേഗത്തിലാണ് നീങ്ങുന്നത്. സര്ക്കാര് ശ്രദ്ധ കേന്ദ്രീകരിക്കേണ്ടത് അത്തരം കാര്യങ്ങള്ക്കാണ്. കേരളത്തിന്റെ വികസനം ലക്ഷ്യമിട്ടുള്ള പ്രവര്ത്തനങ്ങളില് പൂര്ണ്ണ പിന്തുണ നല്കുകയാണ് തന്റെ ലക്ഷ്യമെന്നും അദ്ദേഹം കൂട്ടിച്ചേര്ത്തു.
