മൈസൂരു; ഹൈന്ദവരുടെ ആരാധനാമൂര്ത്തിയും മര്യാദാ പുരുഷോത്തമനുമായ ശ്രീരാമനെയും സീതയേയും വീണ്ടും അപഹസിച്ച് കന്നട സാഹിത്യകാരന് കെ.എസ്. ഭഗവാന്. ശ്രീരാമനെയും സീതയേയും മദ്യപാനികളായി ചിത്രീകരിക്കുന്ന പുസ്തകമാണ് ( രാമമന്ദിര ഏകെ ബേഡ – രാമക്ഷേത്രം എന്തുകൊണ്ട് വേണ്ട) വിവാദമായത്.
രാമനും സീതയും മദ്യപാനികളും മാംസം ഭക്ഷിക്കുന്നവരുമാണെന്നും മറ്റുമാണ് പുസ്തകത്തില്. കഴിഞ്ഞ ദിവസം മാധ്യമപ്രവര്ത്തകരോട് സംസാരിക്കുമ്പോഴും ശ്രീരാമനെക്കുറിച്ച് മോശമായാണ് സംസാരിച്ചത്. തുടര്ന്ന് ഇതിനെതിരെ മാണ്ഡ്യയിലെ ബിജെപി നേതാക്കളായ ശിവകുമാര് ആരാധ്യയും സിടി മഞ്ജുനാഥും ഭഗവാനെക്കുറിച്ച് പരാതി നല്കി. തങ്ങളുടെ വിശ്വാസത്തെ അവഹേളിച്ചുവെന്നും മതവികാരം വ്രണപ്പെടുത്തിയെന്നുമാണ് പരാതിയില് പറയുന്നത്.
പുസ്തകത്തിനെതിരെ ഇന്നലെ മൈസൂറിലെ കെഎസ് ഭഗവാന്റെ വസതിക്കു മുന്നില് ഹിന്ദു സംഘടനകള് രാമപൂജ നടത്തിയും മുദ്രവാക്യം വിളിച്ചും പ്രതിഷേധിച്ചു. മുന്പും ഹിന്ദുദൈവങ്ങളെ അധിക്ഷേപിച്ച് ഭഗവാന് പ്രസംഗിച്ചിട്ടുണ്ട്. ഇതിന്റെ പേരില് കേസുകളുമുണ്ടായിട്ടുണ്ട്.
