പന്തളം കൊട്ടാരം നിര്വാഹക സംഘം പ്രസിഡന്റ് പി.ജി. ശശികുമാര വര്മ പന്തളത്ത് അയ്യപ്പ ജ്യോതി ഉദ്ഘാടനം ചെയ്ത് സംസാരിക്കുന്നു
പന്തളം: ചോദിച്ചു വാങ്ങിയ വിധിയുടെ മറവില് ശബരിമലയെയും വിശ്വാസങ്ങളെയും തകര്ക്കാനാണ് സര്ക്കാര് ശ്രമിക്കുന്നതെന്ന് പന്തളം കൊട്ടാരം നിര്വാഹകസംഘം പ്രസിഡന്റ് പി.ജി. ശശികുമാര വര്മ. പന്തളത്ത് അയ്യപ്പജ്യോതി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സുപ്രീംകോടതി വിധിയുടെ മറവില് ശബരിമല തീര്ഥാടനം താറുമാറാക്കാന് ശ്രമം നടക്കുന്നു. മുമ്പും വിവിധ രാഷ്ട്രീയ പാര്ട്ടികള് വിദേശ ശക്തികളുടെ പിന്തുണയോടെ ശബരിമലയെ തകര്ക്കാന് ശ്രമിച്ചിരുന്നു. ഓരോ തീര്ഥാടനകാലത്തും ഓരോരോ വിവാദങ്ങളുണ്ടാക്കി. എന്നാല്, അയ്യപ്പധര്മ്മത്തിന്റെ പതാകവാഹകരായ ഭക്തര് എല്ലാം സഹിച്ചു. ശബരിമല തകര്ക്കാന് മുമ്പു നടന്നിട്ടുള്ള നീക്കങ്ങളേക്കുറിച്ചും അന്വേഷണം നടത്താന് അധികാരികള് തയാറായിട്ടില്ല.
ദേവസ്വം ബോര്ഡ് അധികാരികള് വിദേശ കാറുകള് മാറ്റുന്നത് ഭക്തര് മനംനൊന്ത് അര്പ്പിക്കുന്ന പണം കൊണ്ടാണെന്നത് മറക്കരുത്. നൂറുകണക്കിനു സുപ്രീംകോടതി വിധികള് നടപ്പാക്കാത്ത സര്ക്കാര് ശബരിമലയ്ക്കെതിരെ തിരിയുന്നതു ദുരൂഹമാണ്. അയ്യപ്പനിലുള്ള ദൃഢമായ വിശ്വാസവും ബഹുമാനവുമാണ് വിശ്വാസികളെ ജാതി മതചിന്തകള്ക്കതീതമായി ഇവിടെ എത്തിച്ചിരിക്കുന്നത്. വിശ്വാസങ്ങള്ക്കെതിരെയുള്ള ആക്രമണങ്ങളെ ഒത്തൊരുമിച്ച് നിന്ന് തോല്പ്പിക്കാമെന്നും അദ്ദേഹം പറഞ്ഞു.
ഇരുനൂറ് വര്ഷം ഭരിച്ച ബ്രിട്ടീഷുകാര് ചെയ്യാത്ത കാര്യമാണ് ശബരിമലയെ തകര്ക്കാന് ഇപ്പോഴത്തെ സര്ക്കാര് നടത്തുന്നതെന്ന് എന്എസ്എസ് ഡയറക്ടര് ബോര്ഡംഗം പന്തളം ശിവന്കുട്ടി പറഞ്ഞു. ഇതിനെതിരെയാണ് അധികാരികളുടെ കണ്ണു തുറപ്പിക്കാന് വിശ്വാസികള് സമാധാനപരമായി അയ്യപ്പ ജ്യോതി തെളിക്കുന്നതെന്നും അദ്ദേഹം പറഞ്ഞു. ശബരിമല കര്മസമിതി പന്തളം നഗരസഭാ സമിതി അധ്യക്ഷന് അഡ്വ. മാലക്കര ശശി അധ്യക്ഷനായി. പന്തളം കൊട്ടാരം നിര്വാഹക സംഘം രക്ഷാധികാരി വിശാഖം നാള് പി. രാമവര്മ രാജ, എന്എസ്എസ് മാവേലിക്കര യൂണിയന് പ്രസിഡന്റ് അഡ്വ.ടി.കെ. പ്രസാദ്, വിശ്വകര്മസഭ സംസ്ഥാന വര്ക്കിങ് പ്രസിഡന്റ് അഡ്വ.സതീഷ് ടി പണിക്കര്, ബിജെപി പത്തനംതിട്ട ജില്ലാ പ്രസിഡന്റ് അശോകന് കുളനട, എസ്എന്ഡിപി യോഗം പന്തളം യൂണിയന് കൗണ്സിലര് സുകു സുരഭി, കര്മസമിതി നഗരസഭാ സമിതി സഹസംയോജകന് മാലേത്ത് അജികുമാര് എന്നിവര് സംസാരിച്ചു.
