ശബരിമല: പതിനെട്ടാംപടിയില്‍ വീണ്ടും പോലീസ് ക്രൂരത. പോലീസിന്റെ ബലപ്രയോഗത്തില്‍ വയോധികയുടെ കഴുത്തിന് പരിക്കേറ്റു. കോഴിക്കോട് നെടുമ്പറമ്പ് സ്വദേശി ഭാര്‍ഗവി (65)ക്കാണ് പരിക്ക്. സുഖമില്ലാത്ത ആളാണെന്ന് പറഞ്ഞിട്ടും പോലീസ് പടിക്കെട്ടിലേക്ക് പിടിച്ചുതള്ളുകയായിരുന്നു.
ചൊവ്വാഴ്ച രാത്രി പത്തരയോടെ ഹരിവരാസന സമയത്ത് പതിനെട്ടാംപടിക്ക് താഴെയാണ് അതിക്രമം. പതിനെട്ടാംപടികയറാനൊരുങ്ങവെ ഡ്യൂട്ടിയിലുണ്ടായിരുന്ന പോലീസുകാരന്‍ ഭാര്‍ഗവിയെ വലിച്ചു പിടിക്കുകയായിരുന്നെന്ന് മകന്‍ സന്തോഷ് പറഞ്ഞു. പതിനെട്ടാംപടി അടയ്‌ക്കുന്ന ഗേറ്റിന്റെ ഗ്രില്ലില്‍ കഴുത്ത് ഞെരുങ്ങി ഭാര്‍ഗവി പടിക്കെട്ടിലേക്ക് വീണു. കാലുകള്‍ പടിക്കെട്ടില്‍ ഇടിച്ചു. കഴുത്തിന് സുഖമില്ലാത്ത ആളാണെന്ന് പറഞ്ഞില്ലേ എന്ന് ചോദിച്ചപ്പോള്‍ സുഖമില്ലാത്തതിനെയൊക്കെ ഇങ്ങോട്ട് കൊണ്ടുവരുന്നതെന്തിനെന്ന് ചോദിച്ച് ഈ പോലീസുകാരന്‍ ആക്രോശിച്ചു. അമ്മയെ കാണാന്‍ പോലും അനുവദിക്കാതെ തന്നെ പടിക്കെട്ടിലേക്ക് തള്ളിക്കയറ്റിയെന്നും മകന്‍ പറയുന്നു. ഭാര്‍ഗവി പടിചവിട്ടിയെങ്കിലും വേദന കാരണം ദര്‍ശനത്തിന് സാധിച്ചില്ല.
ആരോഗ്യസ്ഥിതി മോശമായതോടെ ഇവരെ എന്‍ഡിആര്‍എഫ് സംഘം സന്നിധാനം ആശുപത്രിയില്‍ പ്രവേശിച്ചിച്ചു. പരിശോധനയില്‍ പരിക്ക് ബോധ്യമായതോടെ കഴുത്തിന് ചുറ്റും കോളറിട്ടു. രണ്ട് വര്‍ഷം മുമ്പ് പരിക്കേറ്റ ഭാര്‍ഗവിക്ക് കഴുത്തിന് ശസ്ത്രക്രിയ നടത്തിയിരുന്നു. ഇപ്പോഴും ചികിത്സ തുടരുന്നു. അതിനിടെയാണ് അയ്യപ്പസന്നിധിയില്‍ പോലീസിന്റെ അതിക്രമത്തില്‍ വീണ്ടും പരിക്കേല്‍ക്കുന്നത്.
പുലര്‍ച്ചെ വരെ ആശുപത്രിയില്‍ നിരീക്ഷണത്തിലായിരുന്നു ഭാര്‍ഗവി. കെട്ട് നിറച്ച് വന്നതിനാല്‍ രാവിലെ വേദന സഹിച്ച് ദര്‍ശനം നടത്തി നാട്ടിലേക്ക് മടങ്ങി. സന്നിധാനത്തും പതിനെട്ടാംപടിയിലും പോലീസിന്റെ അതിക്രമത്തെക്കുറിച്ച് ജന്മഭൂമി കഴിഞ്ഞ ദിവസങ്ങളില്‍ വാര്‍ത്ത നല്‍കിയിരുന്നു.
