തിരുവനന്തപുരം: പൊന്നമ്പലത്തിലെ ആചാരാനുഷ്ഠാനങ്ങള് തച്ചുതകര്ക്കാനും സത്യമായ പൊന്നുപതിനെട്ടാംപടിയെ മലിനപ്പെടുത്താനും കച്ചകെട്ടിയിറങ്ങിയ ഇടതു സര്ക്കാരിനും മുഖ്യമന്ത്രിക്കും സദ്ബുദ്ധി തോന്നേണയെന്ന് പ്രാര്ഥിച്ച് ഭക്ത ലക്ഷങ്ങള് നാടൊട്ടുക്ക് ദീപം തെളിച്ചു.
ശരണം വിളിച്ചും അയ്യപ്പനാമങ്ങള് ഉരുവിട്ടും ഒരൊറ്റ മനസ്സോടെ, ജാതിമത, വര്ഗ, വര്ണ്ണ ഭേദങ്ങള് മറന്ന് ഹൈന്ദവര് മണ്ചെരാതുകളിലും നാളികേരമുറികളിലെ നീരാജനങ്ങളിലും ദീപം തെളിയിച്ചപ്പോള് അത് മഹാജ്യോതിയായി നാടെങ്ങും നിറഞ്ഞു.
തളരാത്ത അയ്യപ്പഭക്തി… അയ്യപ്പജ്യോതിയില് അണിചേര്ന്ന എണ്പത്തഞ്ചുകാരിയായ കല്യാണിയമ്മ. മലപ്പുറം ചങ്ങരംകുളത്ത് നിന്നുള്ള ദൃശ്യം
വിശ്വാസ സംരക്ഷണത്തിന് വേണ്ടി ജനലക്ഷങ്ങള് ദീപം തെളിയിച്ചത് 795 കിലോമീറ്റര്. ശബരിമലയിലെ വിശ്വാസങ്ങളും ആചാരങ്ങളും സംരക്ഷിക്കണം എന്ന് ആവശ്യപ്പെട്ട് ശബരിമല കര്മസമിതിയുടെ നേതൃത്വത്തില് നടന്ന അയ്യപ്പജ്യോതി കേരളം ഇന്നുവരെ കണ്ടിട്ടില്ലാത്ത ഒന്നായി.
കാസര്കോട്ടു നിന്നും തെളിഞ്ഞ ജ്യോതി സംസ്ഥാന അതിര്ത്തിയായ കളിയിക്കാവിളയും കടന്ന് സാഗര സംഗമ തീര്ഥഘട്ടമായ കന്യാകുമാരിവരെ നീണ്ടപ്പോള് ദീപം തെളിച്ചത് കാല് കോടിയിലധികം പേര്.
കാസര്കോട് ഹൊസങ്കടി ശ്രീധര്മ്മ ശാസ്താക്ഷേത്രത്തില് കൊണ്ടെയൂര് ആശ്രമം മഠാധിപതി സ്വാമി യോഗാനന്ദ സരസ്വതി തെളിച്ച ദീപം ജ്യോതി സംഗമത്തില് അണിനിരന്നവരുടെ മണ്ചെരാതുകളിലൂടെ പകര്ന്ന് കളിയിക്കാവിളവരെ എത്തി. അവിടെ നിന്നും നടന് സുരേഷ്ഗോപി എംപി പകര്ന്ന് നല്കിയ ദീപം കന്യാകുമാരിവരെ വ്യാപിച്ചു.
ശബരിമലയില് കലിയുഗവരദന് തങ്കഅങ്കി ചാര്ത്തി ദീപാരാധന നടത്തിയ സമയത്തായിരുന്നു ആചാര സംരക്ഷണത്തിനായി കുട്ടികള് മുതല് വൃദ്ധര്വരെ രാജവീഥികളിള് മണ്ചെരാതുകള് തെളിയിച്ചത്.
പല സ്ഥലങ്ങളിലും ഭക്തജനബാഹുല്യത്താന് രണ്ടു വരികളായിട്ടാണ് ജ്യോതി സംഗമത്തില് അണി നിരന്നത്. പിഎസ്സി മുന്ചെയര്മാന് ഡോ. കെ.എസ്. രാധാകൃഷ്ണന്, മുന്ഡിജിപിമാരായ ടിപി സെന്കുമാര്, എം.ജി.എ. രാമന്, മാടമ്പ് കുഞ്ഞിക്കുട്ടന്, ചിന്മയ കേരള ഘടകം അധ്യക്ഷന് സ്വാമി വിവിക്താനന്ദ സരസ്വതി, പാലക്കാട് വിക്ടോറിയ കോളേജ് മുന് പ്രിന്സിപ്പാള് ഡോ. സരസു, പ്രശസ്ത ചലച്ചിത്ര സംവിധായകന് അലി അക്ബര്, പന്തളം കൊട്ടാരത്തിലെ ശശികുമാര് വര്മ്മ, നാരായണ വര്മ്മ, തിരുവമ്പാടി ശങ്കരമഠത്തിലെ ജ്ഞാന ചൈതന്യ, അമൃതാനന്ദമയീമഠത്തിലെ വിവേകാമൃതചൈതന്യ, എസ്എന്ഡിപി യോഗം നേതാവ് കെ.എ. ബാഹുലേയന്, പ്രമുഖ സാമൂഹ്യ പ്രവര്ത്തക അശ്വതി ജ്വാല, ശബരിമല കര്മസമിതി വര്ക്കിങ് ചെയര്പേഴ്സന് കെ. പി. ശശികല ടീച്ചര്, പ്രാന്ത സംഘചാലക് പി.ഇ.ബി. മേനോന്, ഒ. രാജഗോപാല് എംഎല്എ, അഡ്വ.കെ.ഗോവിന്ദ ഭരതന് (കര്മ്മസമിതി ചെയര്മാന്) കുളത്തൂര് അദ്വൈതാശ്രമം മഠാധിപതി സ്വാമിചിദാനന്ദപുരി, ആര്എസ്എസ് പ്രാന്ത കാര്യവാഹ് പി. ഗോപാലന്കുട്ടി മാസ്റ്റര്, ആര്എസ്എസ് ക്ഷേത്രീയ പ്രചാരക് ജി. സ്ഥാണു മാലയന്, ബിജെപി സംസ്ഥാന പ്രസിഡന്റ് അഡ്വ. പി.എസ്. ശ്രീധരന്പിള്ള, സംസ്ഥാന ജനറല് സെക്രട്ടറി ശോഭാസുരേന്ദ്രന് തുടങ്ങി അനവധി പ്രമുഖര് വിവിധ സ്ഥലങ്ങളില് ജ്യോതി തെളിയിക്കാന് എത്തിയിരുന്നു.
