ന്യൂദല്‍ഹി : ജമ്മുകശ്മീര്‍ സിയാച്ചിനില്‍ ഒരു വര്‍ഷം മുമ്പ് 18,000 അടി ഉയരത്തില്‍ കുടുങ്ങിയ ഹെലികോപ്ടര്‍ സുരക്ഷിതമായി ഇന്ത്യന്‍ സൈന്യം തിരിച്ചെത്തിച്ചു. കഴിഞ്ഞ ജനുവരിയില്‍ സിയാച്ചിനില്‍ കുടുങ്ങിയ ധ്രുവ് എന്ന ഹെലിക്കോപ്ടറാണ് ഇന്ത്യന്‍ സൈന്യത്തിന്റെ പ്രയത്‌നത്തില്‍ ബേസ് ക്യാമ്പില്‍ എത്തിക്കാനായത്.
ഈ വര്‍ഷം ആദ്യം സൈന്യം ധ്രുവ് ഹെലിക്കോപ്ടറില്‍ പെട്രോളിങ് നടത്തുന്നതിനിടെ സാങ്കേതിക തകരാര്‍ ശ്രദ്ധയില്‍ പെട്ടതിനെ തുടര്‍ന്ന് 18,000 അടി ഉയരത്തില്‍ അടിയന്തിരമായി നിലത്തിറക്കുകയായിരുന്നു. എന്നാല്‍ ഹെലിക്കോപ്ടര്‍ സുരക്ഷിതമായി നിലത്തിറക്കിയെങ്കിലും മഞ്ഞില്‍ കുടുങ്ങിയതിനാല്‍ പറത്താന്‍ സാധിച്ചില്ല.
പിന്നീട് സൈന്യത്തിലെ പെലറ്റുമാരും സാങ്കേതിക വിദഗ്ധരും സ്ഥലതെത്തി തകരാര്‍ സംഭവിച്ച ഉപകരണങ്ങള്‍ക്ക് പകരം പുതിയവ മാറ്റി സ്ഥാപിച്ചു. തുടര്‍ന്ന് കഴിഞ്ഞ ജൂലൈയിലാണ് ഹെലിക്കോപ്ടര്‍ പറത്താനുള്ള ശ്രമങ്ങള്‍ വിജയം കണ്ടത്. മഞ്ഞും മറ്റു തടസ്സങ്ങളും നീക്കി കഴിഞ്ഞ ദിവസം ഹെലിക്കോപ്ടര്‍ ബേസ് ക്യാമ്പില്‍ എത്തിക്കുകയായിരുന്നു. ലോകത്തില്‍ ഏറ്റവും കൂടുതല്‍ ഉയരത്തില്‍ സൈനിക ഹെലിക്കോപ്ടര്‍ പറത്തുന്ന ചുരുക്കം ചില രാജ്യങ്ങളില്‍ ഒന്നാണ് ഇന്ത്യ.
