തിരുവനന്തപുരം: ബിജെപി സംസ്ഥാന ജനറല്‍ സെക്രട്ടറി കെ. സുരേന്ദ്രന്റെ മീറ്റ് ദ പ്രസ് മുടക്കാനുള്ള സിപിഎമ്മുകാരായ മാധ്യമപ്രവര്‍ത്തകരുടെ നീക്കം പൊളിച്ചു. മുതിര്‍ന്ന മാധ്യമപ്രവര്‍ത്തകര്‍ രംഗത്തെത്തിയതോടെ ഇവര്‍ നാണംകെട്ട് പിന്മാറി. മീറ്റ് ദ പ്രസ്സിനിടെ സുരേന്ദ്രനെ പ്രകോപിപ്പിച്ച് കുടുക്കിലാക്കാനുള്ള നീക്കവും പാളി. ചോദ്യങ്ങള്‍ക്കെല്ലാം സൗമ്യനായി സുരേന്ദ്രന്‍ മറുപടി നല്‍കി.
ഇന്നലെ ഉച്ചക്ക് 2.30ക്കാണ് മീറ്റ് ദ പ്രസ് നിശ്ചയിച്ചിരുന്നത്. ഇതിനെതിരെ മന്ത്രി കെ.കെ. ഷൈലജയുടെ പിഎയും ദേശാഭിമാനി ലേഖകനുമായ പ്രദീപ്, മെട്രോ വാര്‍ത്തയിലെ ദിനേശ്, അരവിന്ദ്, ന്യൂസ് 18ലെ വി.വി. അരുണ്‍, സുപ്രഭാതത്തിലെ അന്‍സാര്‍, ജീമോന്‍ ജേക്കബ്, ശ്യാംലാല്‍ എന്നിവര്‍ രംഗത്തെത്തി. സുരേന്ദ്രന്‍ കേസിലെ പ്രതിയാണെന്നും മീറ്റ് ദ പ്രസ് അനുവദിക്കില്ലെന്നും ഇവര്‍ ഭീഷണിപ്പെടുത്തി. ഇതിന് പിന്നാലെ പരിപാടി റദ്ദാക്കിയതായി പ്രസ് ക്ലബ് അധികൃതര്‍ വാട്സ് ആപ്പ് ഗ്രൂപ്പില്‍ അറിയിച്ചു. ഇതോടെ മറ്റ് മാധ്യമപ്രവര്‍ത്തകര്‍ ഒന്നടങ്കം പ്രതിഷേധിച്ചു.
കേസില്‍ പ്രതിയാകുന്നതാണ് പ്രശ്നമെങ്കില്‍ മുഖ്യമന്ത്രി പിണറായി വിജയനും മന്ത്രി കടകംപള്ളി സുരേന്ദ്രനും മുന്‍മുഖ്യമന്ത്രി ഉമ്മന്‍ ചാണ്ടിയും പ്രതിപക്ഷ നേതാവ് രമേശ് ചെന്നിത്തലയും മുന്‍കേന്ദ്രമന്ത്രി കെ.സി. വേണുഗോപാലുമൊക്കെ എങ്ങനെയാണ് ഇതിന് മുന്‍പ് മീറ്റ് ദ പ്രസ് നടത്തിയതെന്ന് ഇവര്‍ ചോദിച്ചു. പ്രതിഷേധം ശക്തമായതോടെ ഇടത് മാധ്യമപ്രവര്‍ത്തകരെ പിന്തള്ളി പരിപാടി നടത്താന്‍ അധികൃതര്‍ തീരുമാനിച്ചു.
മീറ്റ് ദ പ്രസ് ബഹിഷ്‌കരിക്കുമെന്ന് പറഞ്ഞെങ്കിലും ആകെ നാണംകെട്ടതിനാല്‍ അതിനും അവര്‍ക്ക് കഴിഞ്ഞില്ല. സ്‌ഫോടനക്കേസുകളിലെ മുഖ്യ ആസൂത്രകനായ അബ്ദുള്‍ നാസര്‍ മദനിയുടെ വാര്‍ത്താസമ്മേളനം വിളിച്ചുചേര്‍ക്കുകയും മദനി പോയ വഴിയെല്ലാം തത്സമയം റിപ്പോര്‍ട്ട് ചെയ്യുകയും ചെയ്ത ചില മാധ്യമ പ്രവര്‍ത്തകരാണ് സുരേന്ദ്രനെതിരെ നീങ്ങിയത്.
രാഷ്‌ട്രീയ വൈരാഗ്യത്തിന്റെ പേരില്‍ ഇടത് സര്‍ക്കാര്‍ ജയിലിലടച്ചത് ഉപയോഗിച്ചാണ് സുരേന്ദ്രനെ നിശബ്ദരാക്കാന്‍ ഒരു വിഭാഗം മാധ്യമപ്രവര്‍ത്തകര്‍ ശ്രമിച്ചതെന്നാണ് ഞെട്ടിപ്പിക്കുന്നത്. ഇടത് മാധ്യമ പ്രവര്‍ത്തകരുടെ അസഹിഷ്ണുതയാണ് ഇതോടെ പുറത്തുവന്നതും. നേരത്തെ മാധ്യമങ്ങളില്‍ സിപിഎം ഫ്രാക്ഷന്‍ പ്രവര്‍ത്തിക്കുന്നതായി ബിജെപി സംസ്ഥാന പ്രസിഡന്റ് ശ്രീധരന്‍ പിള്ള ആരോപിച്ചിരുന്നു. ഇത് ശരിവയ്‌ക്കുന്നതാണ് തിരുവനന്തപുരത്തുണ്ടായ സംഭവം. ആവിഷ്ാര സ്വാതന്ത്ര്യം, അഭിപ്രായ സ്വാതന്ത്ര്യം എന്നൊക്കെ വിളിച്ചു കൂവുന്നവരാണ് ഇങ്ങനെ ചെയ്തത്.
