ചെറുപുഴയില്‍ പുഴയോര സര്‍വ്വേ തുടങ്ങി

ചെറുപുഴ: സംസ്ഥാന സര്‍ക്കാരിന്റെ റിവര്‍ ആന്റ് ഡിസാസ്റ്റര്‍ മാനേജ്‌മെന്റിന്റെ നേതൃത്വത്തില്‍ നടക്കുന്ന പുഴയോര സര്‍വ്വേയുടെ രണ്ടാംഘട്ടം കാര്യങ്കോട് പുഴയുടെ ഭാഗങ്ങളില്‍ തുടങ്ങി. പുളിങ്ങോം മുതല്‍ മുക്കട വരെയുള്ള 24 കിലോമീറ്റര്‍ ഭാഗമാണ് സര്‍വേയില്‍ ഉള്‍പ്പെടുത്തിയിട്ടുള്ളത്. കോട്ടയം ആസ്ഥാനമായുള്ള സിആര്‍എം എന്ന ഏജന്‍സി കേരളത്തിലെ 44 നദി തീരങ്ങളിലും നടത്തുന്ന സര്‍വ്വേയുടെ ഭാഗമായിട്ടാണ് റവന്യൂ രേഖകളില്‍ പെരുമ്പട്ട പുഴയെന്ന് രേഖപ്പെടുത്തിയിട്ടുള്ള ഈ ഭാഗത്ത് സര്‍വേ നടക്കുന്നത്. പുഴയുടെ ഇരുഭാഗങ്ങളിലും 50 മീറ്റര്‍ ഭാഗത്ത് ക്രെഡസ്റ്റല്‍ മാപ്പിന്റെ സഹായത്തോടെ മാര്‍ക്ക് ചെയ്യുകയാണ്. പുഴയുടെ ഉള്ളിലുള്ള മണലിന്റെ അളവ്, വാട്ടര്‍ ലവല്‍ എന്നിവ വിലയിരുത്തുകയും പുഴ കയ്യേറ്റം നടന്നിട്ടുള്ള ഭാഗങ്ങള്‍ തിരിച്ചറിയല്‍ എന്നിവ സര്‍വേയുടെ ലക്ഷ്യങ്ങളാണ്. ആദ്യഘട്ട സര്‍വേയില്‍ പുഴയോര മേഖലകളിലെ കൃഷിയും അനുബന്ധ മേഖലകളുമായി ബന്ധപ്പെട്ട പഠനം നടന്നിരുന്നു. സമീപകാലത്തെ പ്രകൃതിദുരന്തങ്ങളുടെ പശ്ചാത്തലത്തില്‍ പുഴ സംരക്ഷണത്തിനായി പുതിയ നയം രൂപീകരിക്കുന്നതിന്റെ ഭാഗമായാണ് സര്‍വ്വേ. കണ്ണൂര്‍ കാസര്‍കോട് ജില്ലയുടെ അതിര്‍ത്തി പങ്കിടുന്ന പെരുമ്പട്ട പുഴ ഏറ്റവും കൂടുതല്‍ മലിനീകരണ ഭീഷണി നേരിടുന്നതാണ്. പുറമ്പോക്കുകള്‍ വ്യക്തമായി കണ്ടെത്തി സംരക്ഷിക്കാന്‍ റവന്യൂ, പഞ്ചായത്ത് വകുപ്പുകള്‍ക്ക് സര്‍വേ ഫലം പ്രയോജനപ്പെടും. ടീം ലീഡര്‍ സി.പി.ഹേമചന്ദ്രന്റെ നേതൃത്വത്തിലാണ് സര്‍വ്വേ.