തലശ്ശേരി: തീര്ത്ഥാടന ടൂറിസം പദ്ധതിയില്പെടുത്തി മൂന്നര കോടി രൂപയിലേറെ മുടക്കി സംസ്ഥാന ടൂറിസം വകുപ്പ് ഉത്തര മലബാറിലെ പുണ്യ പുരാതനമായ അണ്ടലൂര് കാവില് സജ്ജീകരിക്കുന്ന തെയ്യം മ്യൂസിയം, ഊട്ടുപുര, വിശ്രമമുറികള് എന്നിവയുടെ നിര്മ്മാണ പ്രവൃത്തി അവസാനഘട്ടത്തില്. അണ്ടലൂരിന്റെ മുഖഛായ മാറ്റുന്ന ഈ മൂന്ന് സൗകര്യങ്ങളും അടുത്ത ഒരു മാസത്തിനകം പൂര്ത്തിയാവും. അടുത്ത തിറയുത്സവത്തിന് മുമ്പേ ഇവ നാടിന് സമര്പ്പിക്കും. അണ്ടലൂര്കാവിന്റെ ദേശ പെരുമയും തനിമയും നില നിര്ത്തിയാണ് തെയ്യം അനുഷ്ടാന വ്യാഖ്യാനകേന്ദ്രം നിര്മ്മിച്ചിട്ടുള്ളത്.
രണ്ട് നിലകളിലായി പണിത കെട്ടിടത്തിന്റെ താഴെ ഭാഗത്ത് ഫോട്ടോ ഗാലറിയാണ് ഒരുക്കുക. തെയ്യങ്ങളെ സംബന്ധിച്ച വിവരങ്ങള് തീര്ത്ഥാടകര്ക്കും വിനോദ സഞ്ചാരികള്ക്കും ഇവിടെ ലഭ്യമാക്കും. മുകള് നിലയില് തെയ്യത്തിന്റെ വേഷഭൂഷാദികളും അണിയലങ്ങളും മുഖത്തെഴുത്ത് പ്രത്യേകതകളും വ്യക്തമാക്കുനന്ന മാതൃകകള് പ്രദര്ശിപ്പിക്കും. അണ്ടലൂര് കാവിലെ ഉത്സവം ഒരു ദേശത്തിന്റെയാകെ ആചാര അനുഷ്ടാനങ്ങളെയും സമൂഹത്തെയും എങ്ങനെ നയിക്കുന്നു എന്നത് പഠന വിഷയമാക്കാന് ഉതകുന്ന വിധമാണ് മ്യൂസിയം പ്രവര്ത്തിക്കുക.
ഉത്തര മലബാറിലെ നാടന് കലാപാരമ്പര്യത്തിന്റെ പരിഛേദമാവുന്ന സംവിധാനത്തിന് മാത്രമായി 1,05,10,844 രൂപയാണ് ചിലവഴിക്കുന്നത്. കൂടാതെ 350 ഓളം പേര്ക്ക് ഒന്നിച്ചിരുന്ന് ഭക്ഷണം കഴിക്കാനുള്ള ഊട്ടുപുരയും ഒരുങ്ങിക്കഴിഞ്ഞു. തീര്ത്ഥാടകര്ക്ക് താമസിക്കാന് അത്യാധുനിക മാതൃകയില് വിശ്രമമന്ദിരവും ഉണ്ട്. എട്ട് കിടക്കകളുള്ള ഡോര്മിറ്ററികളാണ് ഇതിലുള്ളത്. കുളിമുറി, ശൗചാലയം, വിഐപി മുറി, ഭിന്നശേഷിക്കാര്ക്ക് വില്ചെയര് കയറാനുള്ള റാമ്പും ഒരുക്കുന്നുണ്ട്. വടകര ഊരാളുങ്കല് സൊസൈറ്റിയാണ് നിര്മ്മാണങ്ങളുടെ കരാര് ഏറ്റെടുത്ത് റിക്കാര്ഡ് വേഗത്തില് പണി നടത്തുന്നത്. കഴിഞ്ഞവര്ഷം സപ്തംബര് 11നാണ് ഇതിന്റെ പ്രവൃത്തി ഉദ്ഘാടനം ചെയ്തത്.
