തിരുവനന്തപുരം: ശബരിമല യുവതി പ്രവേശന വിഷയത്തില് പ്രതിഷേധിച്ച അയ്യപ്പഭക്തരെ അറസ്റ്റ് ചെയ്യുന്നത് തുടരുന്നു. കേസില് ഇതുവരെ അറസ്റ്റിലായവരുടെ എണ്ണം 3,345 ആയി. ഇതില് 122 പേരെ റിമാന്ഡ് ചെയ്തു. 517 കേസുകള് ഇതുവരെ രജിസ്റ്റര് ചെയ്തുകഴിഞ്ഞു. അറസ്റ്റിലായവരില് നാമജപത്തില് പങ്കെടുത്ത സ്ത്രീകളില്ലെന്ന് പോലീസ് പറയുന്നു.
ശബരിമല സന്നിധാനം, പമ്പ, നിലക്കല്, സംസ്ഥാനത്തിന്റെ വിവിധ ഭാഗങ്ങള് എന്നിവിടങ്ങളില് യുവതികളെ തടഞ്ഞതിനും പോലീസിന്റെ ഔദ്യോഗിക കൃത്യ നിര്വഹണം തടസ്സപ്പെടുത്തിയതിനുമാണ് കേസെടുത്തിരിക്കുന്നത്. കഴിഞ്ഞ 24 മുതലാണ് പ്രതിഷേധങ്ങളില് പങ്കെടുത്ത അയ്യപ്പഭക്തരെ അറസ്റ്റ് ചെയ്ത് തുടങ്ങിയത്.
അതേസമയം പോലീസ് നടപടിക്കെതിരെ അയ്യപ്പഭക്തരില് നിന്ന് വ്യാപക പ്രതിഷേധവും ഉയരുന്നുണ്ട്. ഇതേ തുടര്ന്ന് നാമജപ യാത്രകളിലും മറ്റും പങ്കെടുത്ത സ്ത്രീകള്ക്കെതിരെ നടപടി എടുക്കരുതെന്ന് ഡിജിപി നിര്ദേശിച്ചിരുന്നു. അയ്യപ്പഭക്തരെ കൂട്ടമായി അറസ്റ്റ് ചെയ്യുന്ന നടപടിയെ ഹൈക്കോടതിയും രൂക്ഷമായി വിമര്ശിച്ചിരുന്നു.
അക്രമങ്ങളില് പങ്കാളികളായവരെ മാത്രമേ അറസ്റ്റ് ചെയ്യാവു എന്നും സര്ക്കാര് ഗ്യാലറിക്ക് വേണ്ടി കളിക്കരുതെന്നുമാണ് ഹൈക്കോടതി ഡിവിഷന് ബെഞ്ച് വ്യക്തമാക്കിയത്.
