നാരായമെങ്ങോയെടുത്തുവച്ചിട്ടിതാ
നാരായണക്കുറുപ്പോര്‍മ്മയായി
നേരായപാതയില്‍ മാത്രം ചരിച്ചോരീ
നേരും നെറിവുള്ളെഴുത്തുകാരന്‍
ദേശഭക്തി നിറഞ്ഞോരു വരികളില്‍
ദേശീയബോധം തുളുമ്പിയെന്നും
വംശഹത്യക്കെതിരേ വാക്കിനാലിയാള്‍
വാശിയാല്‍ മൂര്‍ച്ചാസ്ത്രമെയ്തു നിത്യം
നാടകംസംഗീതമാട്ടക്കഥകളില്‍
നേടി വിജ്ഞാനമവഗാഹവും
പാടിയതൊക്കെയും പൈതൃകക്കാമ്പുള്ള
ഈടുറ്റ കാവ്യങ്ങളായിരുന്നു
ചാലിച്ചുഹാസ്യമാകാവ്യാക്ഷരങ്ങളില്‍
പാലിച്ചു സത്യധര്‍മ്മാചരങ്ങള്‍
കാലം വഴിമാറി നീങ്ങാനൊരുങ്ങവേ
തൂലികത്തുമ്പിനാല്‍ തേര്‍തെളിച്ചു
തിന്മക്കെതിരേ നിരന്തരം തീക്ഷ്ണമാം
വന്മതില്‍ തീര്‍ത്തൊരീ വാഗ്വിലാസം
ജന്മംമുഴുവനും രാഷ്‌ട്രസേവക്കായി
നന്മയോടെന്നുമുഴിഞ്ഞുവച്ചു
പേരുംപെരുമയുമേറുന്ന ജീവിതം
പാരിലുപേക്ഷിച്ചുയാത്രയായി
തോരാത്ത സങ്കടവേളയിലിന്നിതാ
നേരുന്നു നല്‍പ്രണാമം മഹാത്മന്‍….
ജന്മഭൂമി ഓണ്‍ലൈന്‍