ന്യൂദല്ഹി: നേതാജി സുഭാഷ് ചന്ദ്രബോസ് രാജ്യത്തിന് നല്കിയ അമൂല്യമായ സംഭാവനകള് കണക്കിലെടുത്ത് അദ്ദേഹത്തിന് അര്ഹമായ ആദരവ് നല്കാന് ഒരുങ്ങി ബിജെപിയും കേന്ദ്രവും.സ്വാതന്ത്ര്യത്തിന് വേണ്ടി പോരാടാന് അദ്ദേഹം സ്ഥാപിച്ച ഇന്ത്യന് നാഷണല് ആര്മി( ഐഎന്എ)യുടെ 75ാമത് വാര്ഷികം വിപുലമായ രീതിയില് ആഘോഷിക്കാന് തയ്യാറെടുക്കുകയാണ് ബിജെപി. ഒക്ടോബര് 21നാണ് വാര്ഷിക ദിനം.
ദല്ഹി മുതല് ആന്ഡമാന് നിക്കോബാര് ദ്വീപസമൂഹങ്ങളില് വരെ എത്തുന്ന രീതിയിലാണ് ആഘോഷം ആസൂത്രണം ചെയ്തിരിക്കുന്നത്. ഈ മാസം 21ന് ചെങ്കോട്ടയില്, ഐഎന്എയില് നേതാജിക്കൊപ്പം പ്രവര്ത്തിച്ചവര് ദേശീയ പതാകയുയര്ത്തും. ചടങ്ങില് പ്രധാനമന്ത്രി നരേന്ദ്ര മോദിയും പങ്കെടുക്കും. ആസാദ് ഹിന്ദ് മ്യൂസിയം അദ്ദേഹം രാജ്യത്തിന് സമര്പ്പിക്കും.
നേതാജിയുടെ അനന്തരവന്റെ മകനും ബിജെപി ബംഗാള് ഉപാധ്യക്ഷനുമായ ചന്ദ്രകുമാര് ബോസ്, നന്ദിനി സത്പതി സ്മാരക ട്രസ്റ്റ് അധ്യക്ഷന് സുപാര്ണോ സത്പതി എന്നിവരുടെ അഭ്യര്ഥന പ്രകാരമാണ് മോദി മ്യൂസിയം ഉദ്ഘാടനം ചെയ്യുന്നത്.ആസാദ് ഹിന്ദ് ഗവണ്മെന്റ് അധികാരത്തില് വന്നത് 1943 ഒക്ടോബര് 21നാണ്. സിംഗപ്പൂരിലാണ് നേതാജി ഗവണ്മെന്റ് സ്ഥാപിച്ചത്.
1944 ആഗസ്ത് 14ന് ഐഎന്എയിലെ ബഹാദൂര് ബ്രിഗേഡ്, കേണല് ഷൗക്കത്ത് അലി മാലിക്കിന്റെ നേതൃത്വത്തില് ഇന്ത്യയുടെയും മ്യാന്മറിന്റെയും അതിര്ത്തിയിലുള്ള മണിപ്പൂരിലെ പട്ടണമായ മൊയ്രങ്ങ് പിടിച്ചെടുത്തു. നാലു മാസം ഈ പട്ടണം ഇന്ത്യന് നാഷണല് ആര്മിയുടെ കൈയിലായിരുന്നു. ആസാദ് ഹിന്ദ് ഗവണ്മെന്റിനെ 11 രാജ്യങ്ങള് അംഗീകരിച്ചിരുന്നു. ഇതിന് പല രാജ്യങ്ങളിലും നയതന്ത്രാലയങ്ങളും ഉണ്ടായിരുന്നു.
ലല്തി രാം, ജഗീര് സിങ്ങ്, പരമാനന്ദ്, ജഗ്റാം, രാം ഗോപാല് തുടങ്ങിയ ഐഎന്എ ഭടന്മാര് 21ന് ദല്ഹിയില് നടക്കുന്ന ചടങ്ങുകളില് പങ്കെടുക്കും. ഇന്ത്യയുടെ മുന് സൈന്യാധിപന് മേജര് ജനറല്( റിട്ട) ജി ഡി ബക്ഷിയാകും ചടങ്ങില് ഇവരെ നയിക്കുക. ഐഎന്എയുടെ പ്ളാറ്റിനം ജൂബിലിയുടെ ഭാഗമായി ഡിസംബര് 30ന് മോദി പോര്ട്ട് ബ്ളയറില് എത്തി 150 അടി നീളമുള്ള ദേശീയ പതാക ഉയര്ത്തും. നേതാജിയുടെ സ്മരണാര്ഥം തപാല് സ്റ്റാമ്പും നാണയവും മോദി പുറത്തിറക്കും.
സ്വതന്ത്ര്യ സമരക്കാലത്ത് അനവധി ദേശാഭിമാനികളെ തടങ്കലില് വച്ച ആന്ഡമാനിലെ സെല്ലുലാര് ജയില് പ്രധാനമന്ത്രി സന്ദര്ശിക്കും. 1943 ഡിസംബര് 30നാണ് പോര്ട്ട് ബ്ളയറിലെ ജിംഖാന ഗ്രൗണ്ടില്( ഇന്ന് നേതാജി സ്റ്റേഡിയം) ആദ്യമായി നേതാജി ദേശീയ പതാക ഉയര്ത്തിയത്. ബ്രിട്ടീഷ് ഭരണത്തില് നിന്ന് ആദ്യം സ്വാതന്ത്ര്യം നേടിയ മേഖലയായി ആന്ഡമാന് നിക്കോബാര് ദ്വീപസമൂഹങ്ങളെ നേതാജി പ്രഖ്യാപിക്കുകയും ചെയ്തിരുന്നു.
