ആലപ്പുഴ: ശബരിമല യുവതീപ്രവേശന വിഷയത്തില് കെപിഎംഎസ് വിശ്വാസികള്ക്കൊപ്പമാണെന്ന് ജനറല് സെക്രട്ടറി തുറവൂര് സുരേഷ് പത്രസമ്മേളനത്തില് അറിയിച്ചു. സംഘടനയിലെ അംഗങ്ങളില് തൊണ്ണൂറുശതമാനവും ക്ഷേത്രവിശ്വാസികളാണ്. സുപ്രീംകോടതി വിധിയുടെ പിന്ബലത്തില് കെപിഎംഎസ് കുടുംബത്തിലെ ഒരു സ്ത്രീയും ശബരിമലയില് പോകില്ല. ഇത്തരം കാര്യങ്ങളില് തീരുമാനങ്ങളെടുക്കുമ്പോള് വിശ്വാസികളുടെ താത്പര്യത്തിനായിരുന്നു മുന്ഗണന നല്കേണ്ടിയിരുന്നത്. സുപ്രീംകോടതി വിധി ദൗര്ഭാഗ്യകരമാണെന്നും അദ്ദേഹം പറഞ്ഞു.
എന്നാല് ഹിന്ദുമതത്തില് കാലാനുസൃതമായ മാറ്റങ്ങള് ഇനിയും വരുത്തേണ്ടതുണ്ട്. അവര്ണര്ക്ക് ക്ഷേത്രപ്രവേശനം ലഭിച്ച് 82 വര്ഷം പിന്നിട്ടിട്ടും ശ്രീകോവിലിനുള്ളിലേക്കുള്ള പ്രവേശനത്തിന് ഇപ്പോഴും തടസ്സമുണ്ട്. ദേവസ്വം ബോര്ഡ് നിയമനങ്ങള് പിഎസ്സിക്ക് വിടാന് തയാറാകണമെന്നും അദ്ദേഹം ആവശ്യപ്പെട്ടു. സെക്രട്ടറിയേറ്റ് അംഗം എം.ടി. മോഹനന്, ജില്ലാ പ്രസിഡന്റ് ടി. സന്തോഷ്കുമാര് എന്നിവരും പങ്കെടുത്തു.
