കൊല്ലം: റഫാല് ഇടപാടുമായി ബന്ധപ്പെട്ട ആരോപണങ്ങളില് പരസ്യസംവാദത്തിന് തയാറാണെന്ന് ബിജെപി വക്താവ് ബി. ഗോപാലകൃഷ്ണന്. കൊല്ലത്ത് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം. കോണ്ഗ്രസും സിപിഎമ്മും വസ്തുതാപരമായി കാര്യങ്ങള് വിലയിരുത്തണം. ഫ്രഞ്ച് സര്ക്കാരും കമ്പനിയും നിലപാടുകള് വ്യക്തമാക്കിയതാണ്. രാഷ്ട്രീയലക്ഷ്യത്തോടെ സംസാരിക്കുന്ന പ്രതിപക്ഷം സൈന്യത്തിന്റെ മാനസികനിലയെ ഇടിച്ചുതാഴ്ത്തുകയാണ്, അദ്ദേഹം ആരോപിച്ചു.
രാഹുല് ഗാന്ധിയുടെ സഹോദരീ ഭര്ത്താവ് റോബര്ട്ട് വദ്രയുടെ കമ്പനിയെ ഇടപെടുത്താന് ശ്രമിച്ചതിനെക്കുറിച്ച് പ്രതിരോധമന്ത്രിയായിരുന്ന എ.കെ. ആന്റണി മറുപടി പറയണം. ഫ്രഞ്ച് സര്ക്കാരുമായി ബന്ധപ്പെടാതെ ഇടനിലക്കാരനെ എന്തിന് ചുമതലപ്പെടുത്തി? ചാരക്കേസിനെ മുതലാക്കി അധികാരത്തിലെത്തിയ ആന്റണി സമാന അടവാണ് ഇപ്പോള് നടത്തുന്നത്. നിലവിലെ ആരോപണങ്ങള് കോണ്ഗ്രസിന്റെ കള്ളക്കളിയാണ്. ഇവര്ക്ക് പാക്കിസ്ഥാന്റെ ശബ്ദമാണ്, ഗോപാലകൃഷ്ണന് പറഞ്ഞു.
കേരളത്തിലെ സര്ക്കാര് അഴിമതിയുടെ പിടിയിലാണ്. ബിയര് ഉല്പ്പാദനം സംബന്ധിച്ച ലൈസന്സ് കൊടുക്കാനുള്ള നീക്കം ഇതിന്റെ ഭാഗമാണ്. വിഷയം ഘടകകക്ഷികളെ പോലും ബോധ്യപ്പെടുത്താന് സിപിഎമ്മിന് കഴിഞ്ഞില്ല. ഇതിനായി പാലക്കാടും കണ്ണൂരും ചിലര് ലൈസന്സിന് മുന്നോട്ട് വന്നിരിക്കുന്നു. ഇതിന് പിന്നില് അടുത്തിടെ മന്ത്രിയായ ഒരു പ്രമുഖനും പങ്കുണ്ട്, അദ്ദേഹം പറഞ്ഞു.
