ചാത്തന്നൂര് (കൊല്ലം): പാരിപ്പള്ളി ശ്രീരാമപുരത്ത് ദേശീയപാതയില് ഇന്നലെ പുലര്ച്ചെ മൂന്നര മണിക്കുണ്ടായ കാറപകടത്തില് സഹോദരങ്ങളായ യുവാക്കള് മരിച്ചു. കരിക്കോട്ചാത്തിനാംകുളം അംബേദ്കര് കോളനിയിലെ എകെ ഭവനില് രാജു-ശശികല ദമ്പതികളുടെ മക്കളായ കിരണ് ലാല് (22) ശരത് ലാല് (20) എന്നിവരാണ് മരിച്ചത്.
ഗുരുതരമായി പരിക്കേറ്റ മറ്റു നാലുപേരെ തിരുവനന്തപുരം മെഡിക്കല് കോളേജില് പ്രവേശിപ്പിച്ചിച്ചു. രണ്ടുപേരുടെ നില ഗുരുതരമാണ്. വിശാഖ് (21), മണികണ്ഠന് (22), വിഷ്ണുരാജ് (23), ശ്രീരാജ് (22) എന്നിവരാണ് മെഡിക്കല് കോളേജില് ചികിത്സയിലുള്ളത്. സുഹൃത്തുക്കളായ ഇവരെല്ലാം ചാത്തിനാംകുളം സ്വദേശികളാണ്. മരിച്ച കിരണ് ടെക്നോപാര്ക്കിലെ ജീവനക്കാരനാണ്. ശരത്ത് എഞ്ചിനീയറിംഗ് ബിരുദധാരിയുമാണ്. സുഹൃത്തിനെ തിരുവനന്തപുരം വിമാനത്താവളത്തില് യാത്രയാക്കിയതിനുശേഷം കൊല്ലത്തേക്ക് തിരിച്ചുവരുമ്പോള് ദേശീയപാതയോരത്തെ മരത്തില് കാര് ഇടിച്ചു കയറുകയായിരുന്നു.
സുഹൃത്തുക്കളായ സംഘം രണ്ട് കാറുകളിലായാണ് സഞ്ചരിച്ചിരുന്നത് അതില് ഒരു കാറാണ് അപകടത്തില്പെട്ടത്. കാറോടിച്ചിരുന്ന ആള് ഉറങ്ങിപ്പോയതാകാം അപകടകാരണമെന്ന് പോലീസ് നിഗമനം. പോസ്റ്റുമാര്ട്ടത്തിനുശേഷം 4മണിയോടെ മൃതദേഹങ്ങള് വീട്ടിലെത്തിച്ചു. മുളങ്കാടകം ശ്മശാനത്തില് വൈകിട്ട് മൃതദേഹങ്ങള് സംസ്ക്കരിച്ചു.
