തിരുവനന്തപുരം : ഭൂമിയുടെ ലഭ്യതയും പാരിസ്ഥിതിക പ്രശ്നങ്ങളും മറ്റ് ഭൗമശാസ്ത്ര പ്രശ്നങ്ങളും പരിഗണിച്ചുകൊണ്ടു മാത്രമേ കെട്ടിടങ്ങള് നിര്മിക്കുന്നതിനുള്ള അനുമതി നല്കാവൂ എന്ന് ഭരണ പരിഷ്കാര കമ്മീഷന് ചെയര്മാന് വി.എസ്. അച്യുതാനന്ദന്.
ശാസ്ത്രീയ പരിശോധനകളുടെ അടിസ്ഥാനത്തില് ദുരന്ത നിവാരണ അതോറിറ്റിയുടെ അനുമതിയോടെ മാത്രം കെട്ടിട നിര്മാണങ്ങള് അനുവദിക്കാവുന്ന സ്ഥലങ്ങള് കണ്ടെത്തണം. ഉണ്ടായിക്കഴിഞ്ഞ നിര്മിതികളെല്ലാം നിലനിര്ത്തേണ്ടതാണ് എന്ന സമീപനം മാറ്റണം. ഉരുള്പൊട്ടലുകളുടെ അനുഭവം വച്ച്, സമയാസമയങ്ങളില് ഭൗമശാസ്ത്ര പരിശോധനകള് നടത്തി, ദുര്ബലമാകുന്ന പ്രദേശങ്ങളില്നിന്ന് ജനങ്ങളെ ഒഴിപ്പിക്കാനും കെട്ടിടങ്ങള് ഒഴിവാക്കാനുമുള്ള സ്ഥിരമായ സംവിധാനത്തിന് രൂപം കൊടുക്കണമെന്ന് പ്രസ്താവനയില് വിഎസ് ആവശ്യപ്പെട്ടു.
അശാസ്ത്രീയത പ്രചരിപ്പിക്കുന്ന മാഫിയകളെ നിയമപരമായി നേരിടണം. സ്വതവേ ഉരുള്പൊട്ടുന്ന സ്വഭാവമുള്ള ഭൂമിയില് കുന്നിടിക്കുന്നതും പാറമടകള് നടത്തുന്നതും ന്യായീകരിക്കാനാവില്ല. എല്ലാ നിര്മാണപ്രവര്ത്തനങ്ങളും പാരിസ്ഥിതിക അച്ചടക്കവും ഉല്പ്പാദന വ്യവസ്ഥയുടെ അച്ചടക്കവും പാലിക്കുന്നുണ്ട് എന്ന് സര്ക്കാര് ഉറപ്പുവരുത്തണം. വീടുകള്ക്കും ഇതര നിര്മിതികള്ക്കും വെവ്വേറെ അനുമതികള് വേണം. ജനവാസമേഖല, വാണിജ്യ മേഖല, വ്യവസായ മേഖല എന്നിങ്ങനെയുള്ള വേര്തിരിവുകളുടെ അഭാവത്തില്, ദുരന്തനിവാരണ പ്രവര്ത്തനങ്ങള്ക്ക് പ്രയാസം നേരിടും. വീടു നിര്മാണത്തിന് ചില ക്രിയാത്മക മാതൃകകള് രൂപപ്പെടുത്തണം. സുനാമി ദുരന്തത്തില്നിന്ന് ചിലി കരകയറിയപ്പോള് അവര് നിര്മിച്ചത് പിന്നീട് വികസിപ്പിക്കാവുന്ന രീതിയില് നിര്മാണം പൂര്ത്തിയാക്കിയ വീടുകളാണ്. ഇത്തരം മാതൃകകള് കണ്ടെത്തണം.
സഹകരണ ബാങ്കുകളുടെ കണ്സോര്ഷ്യമുണ്ടാക്കി, കടപ്പത്രത്തിലൂടെ സാമ്പത്തിക സമാഹരണം നടത്താന് ശ്രമിക്കണം. ഗ്രാമീണ നിര്മാണ പ്രവര്ത്തനങ്ങള് എന്നാല് കേവലം റോഡുകളും പാലങ്ങളും മാത്രമാണെന്ന ധാരണ തിരുത്തണം. തദ്ദേശ സ്വയംഭരണ സ്ഥാപനങ്ങളുടെയും കൃഷി വകുപ്പിന്റെയും നേതൃത്വത്തില് സഹകരണ കണ്സോര്ഷ്യത്തിന്റെ സഹായത്തോടെ നടത്തേണ്ട ദീര്ഘകാല ഉല്പ്പാദനവ്യവസ്ഥയുടെ പുനസൃഷ്ടിയെക്കുറിച്ച് ചിന്തിച്ചു തുടങ്ങേണ്ട സമയമാണിത്, വിഎസ് അഭിപ്രായപ്പെട്ടു.
