ന്യൂദല്ഹി: കേരളത്തിലെ പ്രളയ ദുരിതാശ്വാസ പ്രവര്ത്തനങ്ങളുമായി ബന്ധപ്പെട്ട് സാമൂഹ്യ മാധ്യമങ്ങളിലൂടെ വിഘടനവാദ ആശയങ്ങള് പ്രചരിപ്പിച്ചവര്ക്കെതിരെ അന്വേഷണം നടത്തി റിപ്പോര്ട്ട് സമര്പ്പിക്കാന് കേന്ദ്ര രഹസ്യാന്വേഷണ വിഭാഗത്തിന് നിര്ദേശം. കേന്ദ്രആഭ്യന്തരമന്ത്രാലയമാണ് ഐബിക്ക് നിര്ദേശം നല്കിയത്. തിരുവനന്തപുരം യൂണിറ്റ് എത്രയും വേഗം ഇതുസംബന്ധിച്ച് സമഗ്രമായ റിപ്പോര്ട്ട് നല്കും. മുന് ഐബി ഡയറക്ടര് അടക്കമുള്ള രഹസ്യാന്വേഷണ വിഭാഗത്തിലെ ഉന്നതര് സംഭവത്തെ ഏറെ ഗൗരവമായി കാണേണ്ടതുണ്ടെന്ന് കേന്ദ്രആഭ്യന്തരമന്ത്രാലയത്തെ അറിയിച്ചു.
കേരളത്തിന് ഉത്തരേന്ത്യന് ലോബിയും പ്രധാനമന്ത്രി നരേന്ദ്ര മോദിയും യാതൊന്നും നല്കുന്നില്ലെന്ന തരത്തില് ചില കേന്ദ്രങ്ങള് പ്രചാരണം നടത്തിയിരുന്നു. കേന്ദ്രത്തിനെതിരെ വിദ്വേഷത്തിന്റെ അന്തരീക്ഷം മനപ്പൂര്വം പ്രചരിപ്പിച്ച ശേഷം ഐക്യ തെക്കേന്ത്യ എന്ന ആശയത്തില് സൗത്ത് ഇന്ത്യ എന്ന പ്രത്യേക രാജ്യം വേണമെന്ന തരത്തിലേക്ക് ചര്ച്ചകള് വഴിതിരിക്കുകയായിരുന്നു. തീവ്ര മുസ്ലിം സംഘടനകള്ക്കൊപ്പം സിപിഎം പ്രവര്ത്തകരും ഇതേ നിലപാടുമായി സാമൂഹ്യമാധ്യമങ്ങളില് എത്തി. ഇത്തരം വിഘടനവാദ ആശയങ്ങള് ഏതു കേന്ദ്രങ്ങളാണ് പ്രചരിപ്പിച്ചത് എന്നതു സംബന്ധിച്ച റിപ്പോര്ട്ടാണ് അടിയന്തരമായി നല്കേണ്ടത്. ഐബി റിപ്പോര്ട്ടിന്റെ അടിസ്ഥാനത്തില് കൂടുതല് നടപടികളിലേക്ക് കേന്ദ്രആഭ്യന്തരമന്ത്രാലയം കടക്കും.
വിവിധ വിഷയങ്ങളില് സമാനമായ ആശയം പ്രചരിപ്പിക്കാന് മുസ്ലിം തീവ്രവാദ ഗ്രൂപ്പുകള് ശ്രമിച്ചിരുന്നതായി കേന്ദ്രഏജന്സികള് നേരത്തെ കണ്ടെത്തിയിരുന്നു. എന്നാല് പുറമേ സിപിഎം അനുഭാവികളായി കാണുന്ന ചിലര് പോലും ഇതേ നിലപാട് സ്വീകരിച്ച് പരസ്യമായി വന്നത് ഗൗരവമായാണ് ആഭ്യന്തര മന്ത്രാലയം കാണുന്നത്. റൈറ്റ് തിങ്കേഴ്സ് എന്ന ഫേസ്ബുക്ക് ഗ്രൂപ്പിനെ ലക്ഷ്യമിട്ടാണ് അന്വേഷണം ആരംഭിച്ചിരിക്കുന്നത്.
