ന്യൂഡല്ഹി: ദേശീയ ക്രൈസിസ് മാനേജ്മെന്റ് സമിതി(എന്.സി.എം.സി) മൂന്നാമത് യോഗം ചേര്ന്ന് കേരളത്തിലെ രക്ഷാപ്രവര്ത്തനങ്ങള് വിലയിരുത്തി. കാബിനറ്റ് സെക്രട്ടറി പി.കെ. സിന്ഹയുടെ അധ്യക്ഷതയില് ചേര്ന്ന യോഗത്തില് കേരളത്തിലെ ചീഫ് സെക്രട്ടറിയുമായുള്ള വിഡിയോ കോഫറന്സിങ്ങിലൂടെ സൈന്യം, യന്ത്രവല്ക്കൃത ബോട്ടുകള്, ഹെലിക്കോപ്റ്ററുകള്, സുരക്ഷാജാക്കറ്റുകള് എന്നിവയുടെ വിന്യാസത്തെക്കുറിച്ചും ആഹാരം, വെള്ളം, ഔഷധങ്ങള് എന്നിവയുടെ വിന്യാസത്തെക്കുറിച്ചും വൈദ്യുതി, ടെലികോം, ഗതാഗത ബന്ധങ്ങള് പുനഃസ്ഥാപിക്കുന്നതിനെക്കുറിച്ചും ചര്ച്ച ചെയ്തു.
പ്രധാനമന്ത്രി നരേന്ദ്ര േമാദിയുടെ നിര്ദേശപ്രകാരം 67 ഹെലികോപ്റ്ററുകള്, 24 വിമാനങ്ങള്, 548 യന്ത്രവല്കൃതബോട്ടുകള് എന്നിവ കേരളത്തിലേക്ക് അയച്ചു. 6,900ലധികം ജീവന്രക്ഷാ ജാക്കറ്റുകള്, 3000 ലൈഫ് ബോയികള്, 167 ടവര് വിളിക്കുകള്, 2,100 മഴക്കോട്ടുകള്, 1,300 ഗംബൂട്ടുകള്, 153 യന്ത്രവല്കൃത ഈര്ച്ചവാളുകള് എന്നിവയും ലഭ്യമാക്കിയിട്ടുണ്ട്.
ഐ.എ.എഫ്, നാവികസേന, ഒ.എന്.ജി.സി എന്നിവയോട് അഞ്ച് ഹെലികോപ്റ്ററുകള് കൂടി അയയ്ക്കാന് കാബിനറ്റ് സെക്രട്ടറി നിര്ദ്ദേശിച്ചു. ഈറോഡ് മധുര വഴി ട്രെയിനുകള് തിരുവനന്തപുരത്തേക്ക് സര്വീസ് നടത്തുന്നതായി റെയില്വേ അറിയിച്ചു. തിരുവനന്തപുരത്തുനിന്ന് എറണാകുളത്തേക്ക് ആഹാരവും മരുന്നുകളും വഹിച്ചുകൊണ്ടുള്ള പ്രത്യേക ട്രെയിന് സര്വീസുകള് നടത്താനും സന്നദ്ധത പ്രകടിപ്പിച്ചിട്ടുണ്ട്.
ഇന്നു മുതല് യാത്രവിമാനങ്ങളുടെ സര്വീസിനായി കൊച്ചിയിലെ നാവികസേനാ ആസ്ഥാനത്തെ എയര്സ്ട്രിപ്പ് മാറ്റിയെടുക്കാനും അവലോകനയോഗത്തില് തീരുമാനിച്ചു. ടെലിഫോണ് ബന്ധം മെച്ചപ്പെടുത്തുന്നതിനായി ടെലികോം വകുപ്പ് സര്ക്കിളുകള്ക്കുള്ളിലുള്ള റോമിങ് സൗകര്യങ്ങള് സാധ്യമാക്കി. ഇതിലൂടെ ഒരു സേവനദാതാവിന്റേതല്ലെങ്കില് മറ്റൊരു സേവനദാതാവിന്റെ ടവറുകള് ഉപയോഗിക്കാന് കഴിയും. എല്ലാ ഓപ്പറേറ്റര്മാരും സൗജന്യ ഡാറ്റായും എസ്.എം.എസ് സൗകര്യവും വാഗ്ദാനം ചെയ്തിട്ടുണ്ട്. സര്വീസിന് തടസ്സമുണ്ടാകാതിരിക്കാനും ബന്ധം നഷ്ടപ്പെടാതിരിക്കാനുമായി ‘സെല്ലുലാര് ഓണ് വീല്സ്’ എന്നറിയപ്പെടുന്ന മൊബൈല് ടവറുകള് സ്ഥാപിച്ചിട്ടുണ്ട്.
പ്രളയജലം ഇറങ്ങിക്കഴിഞ്ഞാല് അടിയന്തിരമായിത്തന്നെ വിന്യസിക്കുന്നതിനായി മെഡിക്കല് ടീമും മരുന്നുകളും ആരോഗ്യമന്ത്രാലയം ഒരുക്കിനിര്ത്തിയിട്ടുണ്ട്. വിവിധ സംസ്ഥാന സര്ക്കാരുകളും മറ്റ് ഏജന്സികളും നല്കുന്ന സഹായങ്ങളും സാധനങ്ങളും ഫലപ്രദമായി വിതരണം ചെയ്യുന്നതിനു ശരിയായ വിധമുള്ള ഏകോപനം ഉണ്ടാകണന്നെ് കാബിനറ്റ് സെക്രട്ടറി നിര്ദേശിച്ചു. സമയോചിതമായ കേന്ദ്ര സഹായത്തെ ചീഫ് സെക്രട്ടറി അഭിനന്ദിച്ചു.
കേന്ദ്ര ആഭ്യന്തര, ആരോഗ്യ, വ്യോമയാന, ‘ഭക്ഷ്യസംസ്കരണ, ജലവിഭമന്ത്രാലയങ്ങളിലെ സെക്രട്ടറിമാരും കരസേന, നാവികസേന, വ്യോമസേന, തീരദേശ സംരക്ഷണസേന, ദേശീയ ദുരന്ത നിവാരണ സേന, ദേശീയ ദുരന്ത പരിപാലന അതോറിറ്റി (എന്.ഡി.എം.എ) എന്നിവയുടെ പ്രതിനിധികളും കേന്ദ്ര ജലകമ്മിഷന് ചെയര്മാന്, മറ്റ് ഉദ്യോഗസ്ഥര് എന്നിവരും യോഗത്തില് സംബന്ധിച്ചു. കേരള ചീഫ് സെക്രട്ടറിയും ടീമും വിഡിയോ കോഫറന്സിങ്ങിലൂടെയാണു യോഗത്തില് പങ്കെടുത്തത്.
