കൊച്ചി: ഏറ്റവും കൂടുതല് കേരളീയര് സന്ദര്ശിച്ച നഗരങ്ങളുടെ പട്ടികയില് ദുബായ്, ക്വലാലംപൂര്, ബാങ്കോക്ക് എന്നിവ മുന്നില്. മുന്നിര ട്രാവല് ഇ-കൊമേഴ്സ് കമ്പനിയായ ബുക്കിംഗ് ഡോട് കോം ആണ് കേരളീയര് ഏറ്റവും കൂടുതല് ബുക്കു ചെയ്ത രാജ്യങ്ങളുടെ കണക്ക് പുറത്തു വിട്ടത്. 2018 ഏപ്രില് മുതല് ജൂണ് വരെയുള്ള നടപ്പു വര്ഷത്തെ രണ്ടാം പാദത്തിലെ കണക്കാണിത്.
കേരളത്തില് നിന്നും ഏറ്റവും കൂടുതല് യാത്രക്കാര് സന്ദര്ശിച്ച ആദ്യ മൂന്നു നഗരങ്ങളിലാണ് ദൂബായിയും ക്വലാലംപൂരും ബാങ്കോക്കും ഉള്പ്പെടുന്നത്. നാലാം സ്ഥാനം സിംഗപ്പൂരിനും അഞ്ചാം സ്ഥാനം കൊളംബോയ്ക്കുമാണുള്ളത്. കേരളത്തില് നിന്നുള്ള യാത്രക്കാര് കൂടുതലായും കൊച്ചിയില് നിന്നാണ് ടിക്കറ്റ് ബുക്കു ചെയ്യുന്നത്. തിരുവനന്തപുരവും ബാംഗ്ലൂരുമാണ് മലയാളികളുടെ മറ്റ് ടിക്കറ്റ് ബുക്കിംഗ് കേന്ദ്രങ്ങള്. ആഭ്യന്തര ടൂറിസ്റ്റുകള്ക്ക് ഏറെ പ്രിയം ഗുരുവായൂരും ചെന്നൈയുമാണ്.
വരുമാനവും സാമ്പത്തിക സ്രോതസും മെച്ചപ്പെട്ട സാഹചര്യത്തില് മഹാരാഷ്ട്രയില് നിന്നുള്ള യാത്രക്കാരുടെ എണ്ണത്തില് വര്ധനവ് ഉണ്ടായിട്ടുണ്ടെന്ന് ബുക്കിംഗ് ഡോട് കോം ഇന്ത്യ കണ്ട്രി മാനേജര് റിതു മെഹ്റോത്ര പറഞ്ഞു. ഓണ്ലൈന് യാത്രാ ബുക്കിങ്ങിലേയ്ക്ക് മാറുന്നവരുടെ എണ്ണത്തിലും വര്ധനവ് ഉണ്ടായിട്ടുണ്ട്. സ്മാര്ട് ഫോണ് ഉപയോഗം വര്ധിച്ചതിന്റെ സ്വാധീനം ഇ-കൊമേഴ്സിലും ഡിജിറ്റല് പേയ്മെന്റിലും ഉണ്ടായിട്ടുണ്ട്.
