ന്യൂദല്ഹി: അസം പൗരത്വ രജിസ്ട്രിയില് ബിജെപി എംപി അമിത് ഷായെ രാജ്യസഭയില് സംസാരിക്കാന് അനുവദിക്കാതെ പ്രതിപക്ഷ ബഹളം. രാജീവ് ഗാന്ധി പ്രധാനമന്ത്രിയായിരിക്കെയുണ്ടായ അസം കരാറിന്റെ തുടര്ച്ചയാണ് അനധികൃത കുടിയേറ്റക്കാരെ കണ്ടെത്തുന്നതിനുള്ള നടപടികള് ആരംഭിച്ചതെന്നും കോണ്ഗ്രസ്സിന് ഇതിന് ധൈര്യമുണ്ടായില്ലെന്നും അമിത് ഷാ കഴിഞ്ഞ ദിവസം കുറ്റപ്പെടുത്തിയിരുന്നു. തുടര്ന്ന് ബഹളമുണ്ടാക്കിയ കോണ്ഗ്രസ് ഷായുടെ പ്രസംഗം തടസ്സപ്പെടുത്തുകയും ചെയ്തു.
ഇന്നലെ രാജ്യസഭ ആരംഭിച്ചപ്പോള്, കഴിഞ്ഞ ദിവസത്തെ സംഭവങ്ങള് നിരാശയുണ്ടാക്കിയതായി സഭാധ്യക്ഷന് വെങ്കയ്യ നായിഡു പറഞ്ഞു. തുടര്ന്ന് പ്രസംഗം പൂര്ത്തിയാക്കുന്നതിനായി അമിത് ഷായെ അദ്ദേഹം ക്ഷണിച്ചു. എന്നാല് ഷാ മാപ്പ് പറയണമെന്നാവശ്യപ്പെട്ട് പ്രതിപക്ഷ എംപിമാര് നടുത്തളത്തിലിറങ്ങി ബഹളമാരംഭിച്ചു. ആഭ്യന്തര മന്ത്രി രാജ്നാഥ് സിങ്ങിനെയും സംസാരിക്കാന് അനുവദിച്ചില്ല. ആദ്യം ഉച്ചയ്ക്ക് 12 വരെയും പിന്നീട് രണ്ട് വരെയും നിര്ത്തിവെച്ച രാജ്യസഭ പിന്നീട് പിരിഞ്ഞു.
റോഹിംഗ്യകള് അനധികൃത കുടിയേറ്റക്കാരാണെന്നും അഭയാര്ത്ഥികളായി കണക്കാക്കാക്കാനാവില്ലെന്നും ആഭ്യന്തര സഹമന്ത്രി കിരണ് റിജിജു ലോക്സഭയില് പറഞ്ഞു. നിയമവിരുദ്ധ പ്രവര്ത്തനങ്ങളില് ഇവര് ഏര്പ്പെട്ടതായി റിപ്പോര്ട്ടുകള് ലഭിച്ചിട്ടുണ്ട്. അതിര്ത്തിയില് കുടിയേറ്റക്കാരെ തടയാന് ബിഎസ്എഫും അസം റൈഫിള്സും അതീവ ജാഗ്രത പുലര്ത്തുന്നുണ്ടെന്ന് രാജ്നാഥ് സിങ് വ്യക്തമാക്കി. ബിജെപി, ശിവസേന അംഗങ്ങളാണ് വിഷയം ഉന്നയിച്ചത്.
