കണ്ണൂര്: ഗൈനെക്കോളജി സൊസൈറ്റിയുടെ കൗമാരപ്രായക്കാര്ക്കു വേണ്ടിയുള്ള ബോധവത്കരണ പരിപാടിയായ ‘തളിരി’ന്റെ മൂന്നാം ഘട്ടത്തിന് തുടക്കം കുറിച്ചു. കണ്ണൂര് സെന്റ് മൈക്കിള്സ് ബോയ്സ് ഹയര് സെക്കണ്ടറി സ്കൂളില് നടന്ന പരിപാടിയുടെ ഉദ്ഘാടനം പിന്നണി ഗായിക സയനോര ഫിലിപ്പ് നിര്വഹിച്ചു. കണ്ണൂര് ഗൈനെക്കോളജി പ്രസിഡന്റ് ഡോ.മിനി ബാലകൃഷ്ണന്, സെക്രട്ടറി ഡോ.പി.ഷൈജസ്, സംസ്ഥാന അഡോള്സെന്റ് ഹെല്ത്ത് കമ്മിറ്റി ചെയര്പേഴ്സണ് ഡോ.സുചിത്ര സുധീര്, നാഷണല് അഡോള്സെന്റ് കമ്മറ്റി ചെയര്പേഴ്സണ് ഡോ.സമ്പത് കുമാരി, സ്കൂള് പ്രിന്സിപ്പാള് ഫാദര് ജോണ്, ഓള്ഡ് ബോയ്സ് അസോസിയേഷന് പ്രസിഡന്റ് സി.ജയചന്ദ്രന് എന്നിവര് ചടങ്ങില് സംബന്ധിച്ചു.
തെറ്റായ ചിന്താഗതികള് കൊണ്ടും ലൈംഗികമായ പ്രേരണകൊണ്ടും ഇന്ന് സമൂഹത്തില് കണ്ടുവരുന്ന വിപത്തുകള് ഒഴിവാക്കാനുള്ള ശ്രമത്തിന്റെ ഭാഗമാണ് തളിരിന്റെ മൂന്നാം ഘട്ടം. ബോധവല്ക്കരിക്കേണ്ടത് പെണ്കുട്ടികളെയല്ല പകരം ആണ്കുട്ടികളെയാണ് എന്നതിന്റെ അടിസ്ഥാനത്തിലാണ് ‘ബോയ്സ് ഒണ്ലി’ പരിപാടി ആരംഭിച്ചത്. കൗമാരപ്രായക്കാരനായ ഒരു ആണ്കുട്ടിയുടെ ശരീരത്തിലും മനസ്സിലും വരുന്ന മാറ്റങ്ങള്, അതിനെ നേരിടാന് വേണ്ടി അവരുടെ മാതാപിതാക്കള് അറിയേണ്ട കാര്യങ്ങള്, ഒരു പെണ്കുട്ടിയെക്കുറിച്ച് അവന് അറിയേണ്ടതെല്ലാം, ഇന്റര്നെറ്റ് ഉപയോഗിക്കുമ്പോള് ശ്രദ്ദിക്കേണ്ട കാര്യങ്ങള്, ഒരു പെണ്കുട്ടിയെ ബഹുമാനിക്കേണ്ടതിന്റെ ആവശ്യകത എന്നീ വിഷയങ്ങളെക്കുറിച്ച് ബോധവത്കരണ ക്ലാസുകള് നടന്നു. ഡോ.ഷൈജസ്, ഡോ.ശ്രീകൃഷ്ണകിരണ്,ഡോ.ബിന്ദു കോശി,ഡോ.സംഗീത എന്നിവര് ക്ലാസുകള്ക്ക് നേതൃത്വം നല്കി. കുട്ടികള്ക്കായി ഫുട്ബോള് ലോകകപ്പ് ചോദ്യങ്ങളുമായി സ്പോര്ട്സ് ക്വിസ്സും നടന്നു. തളിര് പ്രോജക്ടിന്റെ ആദ്യ ഘട്ടം കണ്ണൂര് ടൗണ് പരിധിയില്പെട്ട സ്കൂളുകളില് കേന്ദ്രീകരിച്ചപ്പോള്, രണ്ടാം ഘട്ടം പിന്നോക്കം നില്ക്കുന്ന മലയോര പ്രദേശങ്ങളില് ആണ് നടപ്പിലാക്കിയത്.
