കണ്ണൂര്: ഗൈനക്കോളജി സൊസൈറ്റിയുടെ കൗമാരപ്രായക്കാര്ക്ക് വേണ്ടിയുള്ള ബോധവല്ക്കരണ പരിപാടിയായ തളിരിന്റെ മൂന്നാം ഘട്ടത്തിന് 26 ന് തുടക്കം കുറിക്കും. കണ്ണൂര് സെന്റ് മൈക്കിള്സ് ബോയ്സ് ഹയര്സെക്കണ്ടറി സ്കൂളില് പ്രശസ്ത പിന്നണി ഗായിക സനയനോര ഫിലിപ്പ് പരിപാടി ഉദ്ഘാടനം ചെയ്യുമെന്ന് ഭാരവാഹികള് വാര്ത്താസമ്മേളനത്തില് പറഞ്ഞു. നാഷണല് അഡോളസെന്റ് കമ്മറ്റി ചെയര്പേഴ്സണ് ഡോ.സമ്പത് കുമാരി വിശിഷ്ടാതിഥിയായിരിക്കും.
തളിര് പ്രൊജക്ടിന്റെ ആദ്യഘട്ടം കണ്ണൂര് ടൗണ് പരിധിയിലെ സ്കൂളിലും രണ്ടാംഘട്ടം മലയോരപ്രദേശങ്ങളിലുമാണ് നടപ്പിലാക്കിയത്. ലൈംഗികമായ പ്രേരണകൊണ്ട് സമൂഹത്തില് കണ്ടുവരുന്ന വിപത്തുകളെ ഒഴിവാക്കുകയെന്ന ലക്ഷ്യമാണ് തളിരിന്റെ മൂന്നാംഘട്ട പരിപാടിക്കുളളത്. ഇതിന് വേണ്ടി ബോധവല്ക്കരിക്കേണ്ടത് പെണ്കുട്ടികളെയല്ല, പകരം ആണ്കുട്ടികളെയാണെന്ന് മനസ്സിലാക്കി ആണ്കുട്ടികള്ക്ക് മാത്രമായാണ് മൂന്നാംഘട്ട പരിപാടി രൂപകല്പന ചെയ്തിരിക്കുന്നത്. കൗമാരപ്രായക്കാരനായ ആണ്കുട്ടിയുടെ ശരീരത്തിലും മനസ്സിലും വരുന്ന മാറ്റങ്ങള്, അതിനെ നേരിടാന് വേണ്ടി അവരുടെ മാതാപിതാക്കള് അറിയേണ്ട കാര്യങ്ങള്, ഒരു പെണ്കുട്ടിയെക്കുറിച്ച് അവന് അറിയേണ്ടതെല്ലാം, ഇന്റര്നെറ്റ് ഉപയോഗിക്കുമ്പോള് ശ്രദ്ധിക്കേണ്ട കാര്യങ്ങള്, പെണ്കുട്ടിയെ ബഹുമാനിക്കേണ്ടതിന്റെ ആവശ്യകത എന്നീ വിഷയങ്ങളെക്കുറിച്ച് ബോധവത്കരണ ക്ലാസുകള് നടക്കും. വാര്ത്താസമ്മേളനത്തില് സെക്രട്ടറി ഡോ.ഷൈജസ് നായര്, ഡോ.സുചിത്ര സുധീര്, ഡോ.ഡി.ജി.സംഗീത, ഡോ.ബിന്ദു കോശി എന്നിവര് പങ്കെടുത്തു.
