മഹാത്ഭുതങ്ങള് ബാക്കി ഉണ്ടായിരുന്നില്ല. തൊണ്ണൂറ്റി മൂന്നാം മിനിട്ടില് സെര്ജി അഗ്യൂറോ…. അതിനപ്പുറം ഒന്നും ചെയ്യാനാകുമായിരുന്നില്ല. ലോകകപ്പ് ചരിത്രത്തിലെ തന്നെ ത്രസിപ്പിക്കുന്ന മത്സരങ്ങളിലൊന്നില് ഫ്രാന്സിന് വിജയം …. മാര്ക്കസ് റോജോയുടെ ചുമലേറി വന്ന മെസിക്കും അര്ജന്റീനന് കനവുകള്ക്കും വിട…. കാസന് അരീനയില് പരാജിതന്റെ നിത്യഭാവത്തില് മെസി…. മഷനാരോയും മര്ക്കാഡോയും മെസയും പവാനോയും ബനേഗയും ജയിക്കാനായി ഇരമ്പിക്കയറിയപ്പോള് പോലും ബാഴ്സയുടെ തമ്പുരാനെ കണ്ടതേയില്ല.
കടലാസില് പല നിറങ്ങള് ചാലിച്ച് ആരാധകരും കളിയെഴുത്തു വമ്പന്മാരും വരച്ചിട്ട ആ സിഹം ഇരപിടിക്കാനാവാതെ അലഞ്ഞു നടക്കുകയായിരുന്നു … ലോകത്തെയാകെ തന്റെ കാല്ചലനങ്ങളില് കൊരുത്തെടുത്ത് ഈ മൈതാനങ്ങളിലേക്കെത്തിച്ച മറഡോണയുടെ നിഴല് പോലുമാകാന് ആ നീല വരയന് കുപ്പായത്തില് മെസിക്കായില്ല….. നാല് പേര് വട്ടം നിന്നാല് കളി തീര്ന്നു പോകും വിധം ദുര്ബലനാണ് അര്ജന്റീനയ്ക്ക് വേണ്ടി കളിക്കുമ്പോഴൊക്കെ ലയണല് മെസ്സി .
മെസ്സി അസ്തമിച്ച കാസന് അരീനയില് എംബാപ്പെയുടെ ഉദയം. ഫ്രഞ്ച് വിജയഗാഥയുടെ അഴകാവുകയാണ് ഈ പത്തൊമ്പതുകാരന്. ഇരുപത് കൊല്ലം മുമ്പ് മറഡോണയുടെ അര്ജന്റീനയ്ക്കെതിരെ കളിക്കുമ്പോഴാണ് ലോകം മൈക്കല് ഓവനെ കാണുന്നത്. ഇംഗ്ളീഷ് ഫുട്ബാളിനെ പിന്നെ നീണ്ട കാലം ചുമലേറ്റിയ വിസ്മയം …. എംബാപ്പയുടെ വരവും സമാനമാണ്.
ആന്റണി ഗ്രേസ്മാന്റെ ഗോളില് തുടങ്ങിയ ഫ്രാന്സിന് ഡിമരിയയുടെ ക്ളാസ് ഗോളിലൂടെ സമനില. അതായിരുന്നു ആദ്യ പകുതി. അമ്പത്തൊന്നാം മിനുട്ടില് മര്ക്കാഡോ അര്ജന്റീനയെ മുന്നിലെത്തിച്ചതോടെ ഫ്രാന്സിന്റ സമനില തെറ്റി. പിന്നെ നീലപ്പടയുടെ കടന്നാക്രമണമായിരുന്നു. എം ബാപ്പെ കുന്തമുനയായപ്പോള് അര്ജന്റീനയുടെ എല്ലാ പ്രതിരോധവും ചിതറി … അനിവാര്യമാം അന്ത്യ വിധി… എന്നിട്ടും മരിച്ചവനെ ഉയിര്പ്പിക്കുന്ന മെസിഹയുടെ കഥകള് കേട്ട് എന്തിനോ വേണ്ടി തിളയ്ക്കുകയായിരുന്നു ഗാലറി…. ഇപ്പോള് കേള്ക്കുന്നത് ജയിക്കാനെന്ന് പറഞ്ഞിറങ്ങിയവന്റെ ഒടുക്കത്തെ ന്യായം … പൊരുതിയാണ് പോലും തോറ്റത്. .. ഒരാശ്വാസം കവാനിയുടെ ഇരട്ട ഗോളില് ക്രിസ്ത്യാനോയുടെ പോര്ച്ചുഗലും മടങ്ങുന്നു എന്നതാണ്. പക്ഷേ സിആര്7 സ്വന്തം അടയാളം രേഖപ്പെടുത്തിയാണ് മടങ്ങുന്നത്. .. മെസിയോ…
ഒന്നുണ്ട് .. മറഡോണയില് അസ്തമിച്ചെന്ന് കരുതിയ പ്രതീക്ഷകള്ക്ക് മെസിയിലൂടെ പുതിയ പുലരികള് കൊതിച്ചവര് ദോഹയില് കരുത്തനൊരുത്തന് ഇനിയും വരുമെന്ന കരുതലില് കാത്തിരുപ്പാണ് …. തോല്വി അര്ജന്റീനയ്ക്ക് നീണ്ട നാല് കൊല്ലത്തെ പ്രതീക്ഷ കൂടി ആകുന്നത് അങ്ങനെയാണ്.
