ഇടുക്കി: കാലവര്ഷത്തിന്റെ ശക്തി കുറഞ്ഞെങ്കിലും സംഭരണികളിലേക്ക് ഒഴുകിയെത്തുന്ന വെള്ളത്തില് കാര്യമായ കുറവില്ല.
ഇന്നലെ രാവിലെ ലഭിച്ച കണക്ക് പ്രകാരം 44 ശതമാനമാണ് വൈദ്യുതി വകുപ്പിന് കീഴിലുള്ള സംഭരണികളിലെ മൊത്തം ജലശേഖരം. ഇതുപയോഗിച്ച് 1814.895 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനാവും. കഴിഞ്ഞ വര്ഷം ഇതേ സമയം ഉണ്ടായിരുന്ന വെള്ളത്തിന്റെ നാലിരട്ടിയിലും അധികമാണിത്. ഈ മാസം ഇതുവരെ ലഭിച്ചത് 21 ശതമാനം വെള്ളമാണ്. അതായത് 1241.656 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനുള്ള വെള്ളം ഒഴുകിയെത്തി.
ഇടുക്കിയില് നിലവിലെ ജലശേഖരം 2346.6 അടിയാണ്, 43 ശതമാനം. മുന് വര്ഷമിത് 10.46 ശതമാനമായിരുന്നു. നേര്യമംഗലം, പൊരിങ്ങല് സംഭരണികള് നിറഞ്ഞ് കിടക്കുകയാണ്. പമ്പ, കക്കി സംഭരണികളിലെ ജലശേഖരം 46 ശതമാനമായി ഉയര്ന്നു. ഷോളയാര്-35, ഇടമലയാര്-35, കുണ്ടള-21, മാട്ടുപ്പെട്ടി-47, കുറ്റ്യാടി- 67, തര്യോട്-47, പൊന്മുടി-86, ആനയിറങ്കല്-11 ശതമാനം എന്നിങ്ങനെയും കൂടിയിട്ടുണ്ട്.
63.0553 ദശലക്ഷം യൂണിറ്റ് വൈദ്യുതി സംസ്ഥാനത്താകെ ശനിയാഴ്ച ഉപയോഗിച്ചപ്പോള് ആഭ്യന്തര ഉത്പാദനം 23.5833 ദശലക്ഷം യൂണിറ്റായിരുന്നു.
