തിരുവനന്തപുരം: കണ്ണൂരില് സുരക്ഷയൊരുക്കുന്നതില് പോലീസിന് വീഴ്ച പറ്റിയതായി ബിജെപി സംസ്ഥാന അധ്യക്ഷന് കുമ്മനം രാജശേഖരന്.കണ്ണൂരില് ഇന്നലെ നടന്ന കൊലപാതകം പോലീസിന്റെ സാന്നിധ്യത്തില് തന്നെയാണ് നടന്നതെന്നും കുമ്മനം പറഞ്ഞു.
കണ്ണൂരില് നടന്ന രണ്ട് കൊലപാതകങ്ങള്ക്കും തമ്മില് വ്യത്യാസമൊന്നുമില്ല. രണ്ട് കൊലപാതകങ്ങളിലും പ്രതികള്ക്കെതിരേ ശക്തമായ നടപടി സ്വീകരിക്കണം. പ്രതിസ്ഥാനത്ത് നില്ക്കുന്നവരുടെ രാഷ്ട്രീയം നോക്കാതെ നടപടി സ്വീകരിക്കണമെന്നും അദ്ദേഹം കൂട്ടിച്ചേര്ത്തു. പിണറായി സര്ക്കാര് അധികാരത്തിലേറിയനാള് മുതല് സംസ്ഥാനത്ത് രാഷ്ട്രീയ കൊലപാതകങ്ങള് വര്ധിച്ചു. കണ്ണൂരില് ഉള്പ്പെടെ കഴിഞ്ഞ രണ്ട് വര്ഷത്തിനുള്ളില് നടന്ന ആക്രമ സംഭവങ്ങള്ക്ക് മറുപടി പറയാന് പിണറായി സര്ക്കാരിന് ഉത്തരവാദിത്വമുണ്ടെന്നും കുമ്മനം പറഞ്ഞു.
അക്രമപ്രവര്ത്തനം നടത്തുന്നവര്ക്ക് നിര്ബാധം അത് തുടരാനുള്ള അവസരം ഇപ്പോള് കേരളത്തിലുണ്ട്. അക്രമവും സംഘര്ഷവും നടക്കുന്ന മേഖലകളില് ജീവിക്കുന്ന ആളുകളുടെ ജീവനും സ്വത്തിനും സംരക്ഷണം നല്കുന്നതില് പോലീസ് പരാജയപ്പെട്ടിരിക്കുകയാണെന്ന് കുമ്മനം രാജശേഖരന് കുറ്റപ്പെടുത്തി.
