തിരുവനന്തപുരം: ‘എന്റെ അമ്മ തട്ടുകട നടത്തിയാണ് ഇന്നും ജീവിക്കുന്നത്. ഞാനാകട്ടെ തെരുവില് അലഞ്ഞു തിരിയുന്നവര്ക്ക് ഒരു നേരത്തെ അന്നത്തിനുള്ള വഴിയൊരുക്കുന്നു. പണം വാങ്ങിയുള്ള പൊതു പ്രവര്ത്തനമല്ല നടത്തുന്നത്. അധികാര വര്ഗ്ഗത്തിനെതിരെ പറഞ്ഞതിന്റെ പേരില് തന്നെ ജയിലിലടയ്ക്കാനുള്ള നീക്കമാണ് നടക്കുന്നത്’, സാമൂഹിക പ്രവര്ത്തക അശ്വതി ജ്വാലയുടെ വാക്കുകളാണിത്. ജീവന് ഭീഷണിയുണ്ടെന്നും അശ്വതി വാര്ത്താസമ്മേളനത്തില് പറഞ്ഞു. വിദേശ വനിത ലിഗയുടെ തിരോധാനവുമായി ബന്ധപ്പെട്ട് അശ്വതി ജ്വാല പണപ്പിരിവ് നടത്തിയെന്ന് ഡിജിപിയ്ക്ക് പരാതി നല്കിയതിനെ തുടര്ന്നാണ് ലിഗയുടെ സഹോദരി ഇലീസിയോടൊപ്പം വാര്ത്താസമ്മേളനം നടത്തിയത്.
ലിഗയുടെ അന്വേഷണത്തിന് പലപ്പോഴും സ്വന്തം കൈയില് നിന്നുള്ള പണമെടുത്താണു ചെലവാക്കിയത്. കേസിനെ നിയമപരമായി നേരിടും. തെരുവില് അലഞ്ഞു തിരിയുന്നവര്ക്കു ഞങ്ങളുടെ സംഘടനയായ ജ്വാലയുടെ നേതൃത്വത്തില് ഭക്ഷണം വിതരണം ചെയ്യുന്നുണ്ട്. ഇതിനിടെ എവിടെയെങ്കിലും അലഞ്ഞു തിരിയുന്ന നിലയില് ലിഗയെ കണ്ടിരുന്നോ എന്നറിയാനാണ് ഭര്ത്താവ് ആന്ഡ്രൂസ് എന്നെ സമീപിച്ചത്. ആന്ഡ്രൂസിന്റെയും ഇലീസിന്റെയും ഹൃദയവേദനയില് പങ്കു ചേര്ന്നാണ് അവര്ക്കൊപ്പം തിരച്ചിലിനിറങ്ങിയത്. പലപ്പോഴും രാത്രി പന്ത്രണ്ടു മണിവരെ തിരച്ചില് നീളും. കാറിന്റെ പെട്രോളും ഭക്ഷണവും പോലും തങ്ങളുടെ പോക്കറ്റില് നിന്നാണു ചെലവാക്കിയത്. ഹോട്ടലില് ഭക്ഷണം കഴിക്കാന് കയറിയാന് ആന്ഡ്രൂസ് അതിനു പോലും തയ്യാറായിരുന്നില്ല. ലിഗ എവിടെയോ കൊല്ലപ്പെട്ടു കൊണ്ടിരിക്കുകയാണ്. തിരച്ചില് തുടരാമെന്ന് ആന്ഡ്രൂസ് എപ്പോഴും പറയാറുണ്ടെന്നും അശ്വതി വ്യക്തമാക്കി.
ഇത്തരത്തിലാണെങ്കില് നാളെ ഒരു സ്ത്രീയെ ഇതുപോലെ ഒറ്റപ്പെട്ടു കാണാതായാല് ആരും അന്വേഷണത്തിന് ഇറങ്ങുമെന്നു തോന്നുന്നില്ല. കേസിനോടൊപ്പം ഇലീസ നില്ക്കുന്ന കാലത്തോളം അവര്ക്കൊപ്പം നിലയുറപ്പിക്കും. പരാതിയെ നിയമപരമായിത്തന്നെ നേരിടും. പ്രതികരിക്കുന്നവരുടെ വായടപ്പിക്കാനുള്ള നീക്കമാണിതെന്നും അശ്വതി പറഞ്ഞു.
പണപ്പിരിവു നടത്തിയെന്ന ആരോപണം തെറ്റാണെന്ന് ലിഗയുടെ സഹോദരി ഇലീസയും വ്യക്തമാക്കി. അശ്വതിക്ക് പണം നല്കിയിട്ടില്ല. കേസുമായി ബന്ധപ്പെട്ടുള്ള അനാവശ്യ വിവാദങ്ങള് ഒഴിവാക്കണമെന്നും ഇലീസ പറഞ്ഞു. ലിഗയുടെ മരണവുമായി ബന്ധപ്പെട്ട് മുഖ്യമന്ത്രി പിണറായി വിജയനും ഡിജിപി ലോക്നാഥ് ബെഹ്റയ്ക്കും എതിരെ അശ്വതി ഫെയ്സ്ബുക്കിലിട്ട പോസ്റ്റാണ് പരാതിക്കു പിന്നില്. കോവളം സ്വദേശി അനില്കുമാറാണ് ഇലീസയില് നിന്നും ലക്ഷങ്ങള് തട്ടിയെടുത്തു എന്ന് കാണിച്ച് ഡിജിപിയ്ക്ക് പരാതി നല്കിയത്. സ്പെഷ്യല് ബ്രാഞ്ചിനു മുന്നില് അടിയന്തരമായി ഹാജരാകണമെന്ന് ആവശ്യപ്പെട്ട് പോലീസ് തലപ്പത്ത് നിന്ന് വിളിയും വന്നു. എന്നാല് ഇതുമായി ബന്ധപ്പെട്ടു നോട്ടീസൊന്നും അശ്വതിക്ക് നല്കിയിട്ടില്ല. പരാതി നല്കി നിമിഷങ്ങള്ക്കുള്ളിലാണ് വിളി വന്നതും. പരാതി നല്കിയ അനില്കുമാറിനെക്കുറിച്ചും വ്യക്തമായ വിവരമില്ല.
