ന്യൂദല്ഹി: കാസ്റ്റിംഗ് കൗച്ച് (സിനിമയില് വേഷം കിട്ടാന് കിടക്ക പങ്കിടുക) വിഷയത്തില് വിവാദ പരാമര്ശവുമായി കോണ്ഗ്രസ് എംപിയും മുന് വനിതാ ശിശുക്ഷേമ മന്ത്രിയുമായ രേണുകാ ചൗധരി. പരിശുദ്ധമായ പാര്ലമെന്റ് മന്ദിരത്തിലെ മുറികളും കാസ്റ്റിംഗ് കൗച്ച് മനോഭാവത്തില്നിന്ന് മുക്തമല്ലെന്ന് അവര് പറഞ്ഞു. ബോളിവുഡിലെ കാസ്റ്റിംഗ് കൗച്ചിനെ ന്യായീകരിച്ച നൃത്ത സംവിധായികയായ സരോജ് ഖാന്റെ അഭിപ്രായത്തോട് പ്രതികരിക്കുകയായിരുന്നു രേണുക.
കാസ്റ്റിംഗ് കൗച്ച് കയ്പേറിയ സത്യമാണ്. സിനിമാ മേഖലയില് മാത്രമല്ല, എല്ലായിടത്തുമുണ്ട്. മറ്റ് തൊഴില് ഇടങ്ങളും പാര്ലമെന്റുമൊക്കെ മുക്തമാണെന്ന് ചിന്തിക്കരുത്. ഇന്ത്യയൊന്നടങ്കം എഴുന്നേറ്റ് മീ റ്റൂ എന്ന് പറയേണ്ട സമയമാണിത്. അവര് പറഞ്ഞു. ലൈംഗികാതിക്രമങ്ങള്ക്കെതിരെ സ്വന്തം അനുഭവങ്ങള് പങ്കുവെച്ച് കഴിഞ്ഞ ഒക്ടോബര് മുതല് സമൂഹമാധ്യമങ്ങളില് സ്ത്രീകള് നടത്തിയ ക്യാംപയ്നാണ് മീ റ്റൂ. ലൈംഗികാതിക്രമങ്ങള് നേരിടുന്നവരുടെ പ്രശ്നങ്ങള് സമൂഹത്തിലെത്തിക്കാന് യുഎസ്സിലെ ചലച്ചിത്രതാരം അലിസ്സ മനിലാനോയാണ് അനുഭവം തുറന്നുപറയാന് സ്ത്രീകളെ പ്രേരിപ്പിച്ചത്.
ബോളിവുഡില് കാസ്റ്റിംഗ് കൗച്ച് മനോഭാവം വ്യാപകമാണെന്നും ഇത് ലൈംഗിക ചൂഷണമല്ലെന്നും സരോജ് ഖാന് പറഞ്ഞിരുന്നു. കാസ്റ്റിംഗ് കൗച്ച് പെണ്കുട്ടികള്ക്ക് വരുമാനമെങ്കിലും നല്കുന്നുണ്ട്. എല്ലായിടത്തും ഇത്തരം കാര്യങ്ങള് നടക്കുമ്പോള് സിനിമാ മേഖലയെ മാത്രം വില്ലനായി കാണേണ്ടതില്ല. പെണ്കുട്ടിയുടെ സമ്മതത്തോടെയാണിത് സംഭവിക്കുന്നത്. എന്തിനാണ് അവര് തയ്യാറാവുന്നത്. മോശം കാര്യങ്ങള് ചെയ്യില്ലെന്ന് തീരുമാനിച്ചാല് ഇത്തരം അനുഭവങ്ങള് ഉണ്ടാകില്ല. പ്രസ്താവന വിവാദമായതോടെ തന്റെ വാക്കുകള് വളച്ചൊടിച്ചതാണെന്നാരോപിച്ച് ഖാന് രംഗത്തെത്തി.
