പത്തനാപുരം: മലേഷ്യയില് ജോലിതേടിയെത്തി ഒടുവില് മയക്കുമരുന്നു മാഫിയയുടെ ചതിയില്പ്പെട്ട് അഞ്ചുവര്ഷമായി ജയിലില് വധശിക്ഷയുടെ നിഴലിലാണ് നാല് മലയാളി യുവാക്കള്.
പത്തനാപുരം രഞ്ജിത്ത് രവീന്ദ്രന് (29), എരുമേലി സ്വദേശി എബി അലക്സ് (38), വര്ക്കല സ്വദേശി സുമേഷ് സുധാകരന് (32), ചിറ്റാര് സ്വദേശി സജിത്ത് സദാനന്ദന് (31) എന്നിവരാണ് മോചനം പ്രതീക്ഷിച്ചു കഴിയുന്നത്. തങ്ങളുടെ പ്രിയപ്പെട്ടവരുടെ മോചനത്തിനായി മനസ്സുരുകി പ്രാര്ത്ഥനയോടെ കാത്തിരിക്കുകയാണ് കുടുംബാംഗങ്ങള്.
വെല്ഡിങ് ജോലിക്കായാണ് 2013 ജൂലൈ ഒന്പതിന് ഇവര് ചെന്നൈയില്നിന്ന് മലേഷ്യക്ക് പോയത്. വിസയ്ക്ക് ഒരുലക്ഷം രൂപയാണ് ആവശ്യപ്പെട്ടത്. 50,000 രൂപവീതം ഏജന്റുമാരായ വര്ക്കല സ്വദേശി അനൂപ്, സഹോദരന് ഷാജഹാന് എന്നിവര്ക്ക് നല്കി. ബാക്കി തുക ശമ്പളത്തില്നിന്ന് നല്കണമെന്നായിരുന്നു വ്യവസ്ഥ. എന്നാല് പറഞ്ഞ ജോലിയല്ല അവര്ക്ക് മലേഷ്യയില് ലഭിച്ചത്. മെര്ക്കുറി’എന്ന പ്ലാസ്റ്റിക് നിര്മാണ കമ്പനിയില് ശുചീകരണ ജോലിയാണ് കിട്ടിയത്. 2013 ജൂലൈ 26ന് ഇവര് താമസിച്ചിരുന്ന മുറിയില് പോലീസ് നടത്തിയ പരിശോധനയില് കമ്പനി ഡ്രൈവറും തമിഴ് വംശജനുമായ മലേഷ്യന് സ്വദേശി നാഗരാജന്റെ ബാഗില്നിന്ന് ലഹരിമരുന്നു പിടികൂടി.
ചിറ്റാര്സ്വദേശി സിജോ തോമസ്, മാവേലിക്കര സ്വദേശി രതീഷ് രാജന്, വര്ക്കല സ്വദേശി മുഹമ്മദ് കബീര് ഷാഫി, ചൈന്നെ സ്വദേശി ഷാജഹാന് എന്നിവര് അറസ്റ്റിലായി. തുടര്ന്ന് ഇവര് ജോലി ചെയ്തിരുന്ന കമ്പനിയില്നിന്ന് ലഹരിമരുന്നു പിടിച്ചെടുത്തു. അവിടെ വച്ചാണ് പത്തനാപുരം സ്വദേശി രഞ്ജിത്ത് രവീന്ദ്രന്, ചിറ്റാര് സ്വദേശി സജിത് സദാനന്ദന്, എരുമേലി ചാത്തന്തറ സ്വദേശി എബി അലക്സ്, വര്ക്കല സ്വദേശി സുമേഷ് സുധാകരന്, മലേഷ്യന് പൗരന് സര്ഗുണന് എന്നിവര് അറസ്റ്റിലാകുന്നത്.
ഇവരുടെ മോചനം ഉടനെ ഉണ്ടാവുമെന്നും മറ്റു ശ്രമങ്ങളുണ്ടായാല് മോചനം ബുദ്ധിമുട്ടാകുമെന്നുമുള്ള കമ്പനി അധികൃതരുടെ വാക്കുകളില് വിശ്വാസം അര്പ്പിച്ചിരിക്കുകയായിരുന്നു അറസ്റ്റിലായവരും ബന്ധുക്കളും. അതിനാല് നാട്ടില്നിന്ന് ശ്രമങ്ങള് നടത്താതിരുന്ന ബന്ധുക്കള് പിന്നീടാണ് കമ്പനിയുടെ ചതി തിരിച്ചറിഞ്ഞത്. കഴിഞ്ഞമാസം ജയില് മോചിതനായി നാട്ടില് തിരിച്ചെത്തിയ സിജോ തോമസില്നിന്നാണ് കൂടുതല് വിവരങ്ങള് ബന്ധുക്കളറിഞ്ഞത്. മലേഷ്യന് കോടതി രഞ്ജിത്ത്, സുമേഷ്, എബി, സജിത്ത് എന്നിവര്ക്ക് കഴിഞ്ഞ ജനുവരിയില് വധശിക്ഷ വിധിച്ചെന്ന ഞെട്ടിക്കുന്ന വിവരമാണ് സിജോ തോമസ് പറഞ്ഞത്. നിരപരാധികളായ യുവാക്കള് കമ്പനിയൊരുക്കിയ ചതിക്കുഴിയില് അകപ്പെടുകയായിരുന്നു. ഏജന്റുമാര് ഇവരെ ലഹരിമരുന്നു മാഫിയയില് കുടുക്കുകയായിരുെന്നന്നാണ് ബന്ധുക്കള് പറയുന്നത്.
ബിജെപി സംസ്ഥാന അധ്യക്ഷന് കുമ്മനം രാജശേഖരനും വി. മുരളീധരന് എംപിയും വഴി കേന്ദ്രസര്ക്കാരിനെ വിഷയം അറിയിക്കാനും വിദേശകാര്യ മന്ത്രി സുഷമാ സ്വരാജിനെ നേരില് കാണാനുമുള്ള ശ്രമത്തിലാണ് ബന്ധുക്കള്.
