ആലപ്പുഴ: മതതീവ്രവാദ പ്രവര്ത്തനങ്ങള്ക്കെതിരെയായ നീക്കം നിര്ജ്ജീവമാക്കാന് പോലീസിന് മേല് സര്ക്കാരിന്റെ കടുത്ത സമ്മര്ദ്ദം. ലോക്സഭാ തെരഞ്ഞെടുപ്പിന് ഒരു വര്ഷം മാത്രം ശേഷിക്കെ എങ്ങിനെയും മുസ്ലീം മതവിഭാഗത്തെ പ്രീണിപ്പിക്കുക എന്ന ലക്ഷ്യത്തോടെയാണ് സിപിഎമ്മിന്റെ ഭാഗത്തു നിന്ന് ഇത്തരത്തില് നീക്കം നടക്കുന്നത്. ഇതിന്റെ ആദ്യപടിയായി പോലീസില് സംഘപരിവാര് അനുകൂലികള് ഉണ്ടെന്ന് ആക്ഷേപം ഉന്നയിച്ച ചില മുസ്ലീം സംഘടനകളുമായി ചര്ച്ച നടത്തും.
നിലവില് പോലീസിനെതിരെ ജനങ്ങളില് നിന്ന് വ്യാപകമായി ആരോപണങ്ങള് ഉയരുന്ന സാഹചര്യത്തില് ഇതിന്റെ മറപിടിച്ച് തീവ്രവാദ പ്രവര്ത്തനങ്ങള്ക്കെതിരായ അന്വേഷണങ്ങളും അട്ടിമറിക്കാനാണ് ശ്രമം. നിയമസഭാ തെരഞ്ഞെടുപ്പില് സംഘപരിവാര് പ്രസ്ഥാനങ്ങള്ക്കെതിരെയും ബിജെപിക്കെതിരെയും കുപ്രചാരങ്ങള് നടത്തിയാണ് ന്യൂനപക്ഷങ്ങളുടെ പ്രത്യേകിച്ച് മുസ്ലീം മതവിഭാഗത്തിന്റെ വോട്ടുകള് ഇടതുപക്ഷം നേടിയത്.
ഇപ്പോഴത്തെ സാഹചര്യത്തില് അത്തരം നീക്കം വിജയം കാണില്ലെന്ന് ബോദ്ധ്യമായതിന്റെ അടിസ്ഥാനത്തിലാണ് പ്രീണന രാഷ്ട്രീയം പയറ്റാന് സിപിഎം ശ്രമം തുടങ്ങിയത്. രാജ്യ സുരക്ഷയേയും, സമാധാനത്തേയും തകര്ക്കുന്ന സര്ക്കാര് നീക്കത്തില് ഉന്നത പോലീസുദ്യോഗസ്ഥര്ക്കിടയില് കടുത്ത അമര്ഷമുണ്ട്. വിവിധ സംഭവങ്ങളില് പോലീസ് മുസ്ലിം വിരുദ്ധ സ്വഭാവം പ്രകടിപ്പിക്കുന്നുവെന്നും മുസ്ലിങ്ങള്ക്കെതിരെ അകാരണമായോ നിസാര കാരണങ്ങളുടെ പേരിലോ കേസെടുക്കുന്നുവെന്നും മുസ്ളിം സംഘടനകള് ആരോപണം ഉന്നയിച്ചിരുന്നു.
പറവൂരിലെ ലഘുലേഖാ സംഭവം മുതല് പീസ് സ്കൂള് ചെയര്മാന് എം.എം. അക്ബറിന്റെ അറസ്റ്റും ഫാറൂഖ് കോളേജ് അദ്ധ്യാപകന് ജൗഹറിനെതിരായ കേസും വരെ അവര് ഉയര്ത്തിക്കാട്ടിയിരുന്നു. മുസരളീം ലീഗ്, എസ്ഡിപിഐ, വെല്ഫെയര് പാര്ട്ടി, പിഡിപി എന്നിവയെ ഒഴിവാക്കി മുസ്ലിം സമുദായ സംഘടനാ നേതാക്കളെ മാത്രം വിളിച്ചു ചേര്ത്ത് അവരുടെ ആശങ്കകള് പരിഹരിക്കാനെന്ന വ്യാജേന ചര്ച്ച നടത്തും.
സമുദായ സംഘടനകള് ഉന്നയിക്കുന്ന പരാതികള് പരിഹരിക്കുമെന്നും ഉറപ്പു നല്കുകയും തെരഞ്ഞെടുപ്പില് ഇക്കൂട്ടരുടെ പിന്തുണ നേടിയെടുക്കുകയുമാണ് ലക്ഷ്യം. ചര്ച്ചകള്ക്ക് അനുകൂലമായ സാഹചര്യം ഒരുക്കുന്നതിന്റെ ഭാഗമായാണ് തീവ്രവാദ പ്രവര്ത്തനങ്ങള്ക്കെതിരായ പോലീസ് നീക്കത്തെ ദുര്ബലപ്പെടുത്തുന്നതെന്നാണ് ആക്ഷേപം ഉയരുന്നത്.
സംസ്ഥാന പോലീസ് മേധാവി ലോക്നാഥ് ബെഹ്റ, പോലീസ് ഉപദേഷ്ടാവും മുന് ഡിജിപിയുമായ രമണ് ശ്രീവാസ്തവ എന്നിവരുമായി മുഖ്യമന്ത്രി ഈ വിഷയം പ്രാഥമിക ചര്ച്ച നടത്തിയതായി സൂചനയുണ്ട്. സമുദായ സംഘടനകളായ ഇകെ സുന്നി, എപി സുന്നി വിഭാഗങ്ങള്, ജമാഅത്തെ ഇസ്ലാമി, കേരള നദ്വത്തുല് മുജാഹീദിന്, ദക്ഷിണ കേരള ജംഇയ്യത്തുല് ഉലമ എന്നിവയുമായാണ് ചര്ച്ച നടത്തുക.
