കോട്ടയം: സംസ്ഥാനത്തെ 941 ഗ്രാമപഞ്ചായത്തുകളില് 24 ലും സെക്രട്ടറിമാരില്ല. ഇതോടെ ഈ പഞ്ചായത്തുകളുടെ പ്രവര്ത്തനം അവതാളത്തിലായി. പുതിയ സാമ്പത്തിക വര്ഷത്തില് നടത്തേണ്ട പദ്ധതികളുടെ പ്രാരംഭനടപടികള് പോലും തുടങ്ങാനാവാത്ത അവസ്ഥയാണ്. പഞ്ചായത്ത് ഭരണസമിതിയെടുക്കുന്ന തീരുമാനങ്ങള് സെക്രട്ടറി ഇല്ലാത്തതുമൂലം നടപ്പിലാക്കാന് കഴിയുന്നില്ലെന്നാണ് മിക്ക ഭരണസമിതിയുടേയും പരാതി. വിരമിക്കല്, വിരമിക്കലിന് മുമ്പായി എടുക്കുന്ന അവധി എന്നിവ മൂലമാണ് 24 ഗ്രാമപഞ്ചായത്തുകളില് സെക്രട്ടറി തസ്തിക ഒഴിഞ്ഞുകിടക്കുന്നത്.
എടപ്പറ്റ മുത്തേടം, തിരുനെല്ലി, പനമരം എന്നിവിടങ്ങളില് 2018 ജനുവരി മുതല് സെക്രട്ടറിയില്ല. ചേരാനല്ലൂര്, മഞ്ഞളൂര്, അങ്ങാടിപ്പുറം, താഴേക്കോട്, ഊര്ങ്ങാട്ടിരി, അഗളി, കരിമ്പ, കരിമ്പുഴ, നെല്ലിയാമ്പതി, കോങ്ങാട്, മുതലമട, ബാലുശ്ശേരി, കള്ളാര്, കോടോംബേളൂര് എന്നിവിടങ്ങളില് 2018 ഫെബ്രുവരി മുതല് തസ്തിക ഒഴിഞ്ഞുകിടക്കുന്നു. ചെന്നീര്ക്കര, വയലാര്, കൊരട്ടി, മടവൂര്, മേപ്പയ്യൂര്, മാട്ടൂല് എന്നിവിടങ്ങളില് 2018 മാര്ച്ച് മുതല് സെക്രട്ടറിമാരില്ല.
സാമ്പത്തികനില മെച്ചപ്പെട്ട ഗ്രാമപഞ്ചായത്തുകളിലാണ് സര്ക്കാര് ഉത്തരവ് പ്രകാരം ജൂനിയര് സൂപ്രണ്ടിന് സമാനമായ അസിസ്റ്റന്റ് സെക്രട്ടറി തസ്തിക ഉള്ളത്. 865 ഗ്രാമപഞ്ചായത്തുകളില് അസി. സെക്രട്ടറി തസ്തിക നിലവിലുണ്ട്. 76 ഇടങ്ങളില് തസ്തിക നിലവിലില്ല. വകുപ്പുതല പ്രൊമോഷന് കമ്മറ്റി കൂടുകയും ഉദ്യോഗക്കയറ്റം നല്കുന്നതിനുള്ള ജീവനക്കാരുടെ പട്ടിക തയ്യാറാക്കി ഒഴിവുകള് നികത്താനുള്ള നടപടികള് സ്വീകരിച്ചതായാണ് തദ്ദേശ സ്വയംഭരണ വകുപ്പ് പറയുന്നത്.
