ബസ്തര്: കാട്ടിലെ നക്സലൈറ്റുകള്, നദിയിലെ മുതലക്കൂട്ടങ്ങള്, അവര്ക്കിടയിലൂടെ പോകുന്ന സുനിതാ ഠാക്കൂറിന് പേടിയേ ഇല്ല. കാരണം, പാവപ്പെട്ട വനവാസികള്ക്ക് ചികിത്സ ലഭ്യമാക്കുക എന്ന ഏറ്റെടുത്ത ദൗത്യം നിറവേറ്റാനാണ് സുനിത പഠിച്ചത്.
അഞ്ചുവര്ഷമായി മുതലകള് നിറഞ്ഞ പുഴയും തോക്കേന്തിയ നക്സലൈറ്റുകളേയും കടന്ന് സുനിത നിത്യവും ഈ ദൗത്യം നിര്വഹിക്കുന്നു. ഛത്തീസ്ഗഢ് ആരോഗ്യവകുപ്പിലെ നഴ്സ്
ജീവനക്കാരിയാണ് സുനിത. ദന്തവാതെ ജില്ലയിലെ ചേര്പ്പാല് ഗ്രാമത്തിലെ ജനങ്ങള്ക്കാണ് സുനിത മരുന്നും പരിചരണവും എത്തിക്കുന്നത്.
സ്വന്തം ഗ്രാമമായ ബാര്സൂര് ഗ്രാമത്തില്നിന്ന് രാവിലെ സ്വന്തം ഇരുചരകവാഹനത്തില് 10 കിലോ മീറ്റര് സഞ്ചരിച്ച് മുഞ്ചാര് ഘട്ട്വരെ എത്തും. അവിടുന്ന് തുടരാന് ഇന്രദവതി നദി കടക്കണം. നിറയെ മുതലകളുള്ള നദി. നദികടക്കാനും സുനിത സ്വന്തമായി സൗകര്യം ഒരുക്കിയിരിക്കുന്നു. താല്ക്കാലിക ഉപയോഗത്തിന് നിര്മ്മിച്ച ചങ്ങാടമെന്നോ വഞ്ചിയെന്നോ പറയാവുന്ന സംവിധാനം. ആരുമില്ല സഹായിക്കാന്. ഒറ്റയ്ക്ക് തുഴയും. സാഹസികമായി മറുകര കടന്നാലോ?
പിന്നെ ഏറെ ദൂരം കാല്നട. പോകുന്നത് നക്സലൈറ്റുകളുടെ വിഹാര കേന്ദ്രത്തിലൂടെ. അഞ്ചുകിലോയോളം വരുന്ന മരുന്നു പായ്ക്കറ്റും പരിശോധനാ ഉപകരണങ്ങളുമായി വേണം യാത്ര. ഏറെ ശ്രമകരമാണ്. പക്ഷേ സുനിത മുടക്കുന്നില്ല, ഒരു ദിവസവും. എഎന്ഐ വാര്ത്താ ഏജന്സിയാണ് സുനിതയുടെ സാഹസികത റിപ്പോര്ട്ടു ചെയ്തത്.
”ജോലിയില് ഞാന് ദൃഢനിശ്്ചയക്കാരിയാണ്. ഇന്ദ്രാവതി നദി ഞാന് വള്ളത്തില് കടക്കുന്നു. നിബിഡ വനത്തിലൂടെ കാല്നടയായി പോകുന്നു. അവിടെ ഗ്രാമവാസികളായ രോഗികളെ പരിചരിക്കുകയാണ് എന്റെ ജോലി,” സുനിത ഠാക്കൂര് പറയുന്നു.
വീട്ടുപടിക്കല് ചികിത്സ എത്തിച്ച് ഗ്രാമവാസികളുടെ ആരോഗ്യം നോക്കുന്നതിലെ സുനിതയുടെ ദൃഢ നിശ്ചയത്തിന് പ്രേരകമായത് ബസ്തറിലെ ചില സന്നദ്ധ സംഘടനകളുടെ പ്രവര്ത്തകര് കാണിക്കുന്ന ആത്മവിശ്വാസവും നിശ്ചയ ബുദ്ധിയുമാണ്.
ഒരിക്കല് മാവോയിസ്റ്റുകള് സുനിതയെ തട്ടിക്കൊണ്ടുപോയി. സുനിതയുടെ ര്ണട് ലാപ്ടോപ്പുകളും ചില സുപ്രധാന രേഖകളും മറ്റും അവര് കൈക്കലാക്കി. നക്സലുകളും ഒരിക്കല് പിടികൂടി തടഞ്ഞുവെച്ചു.
സുനിതയുടെ മുടക്കമില്ലാത്ത അഞ്ചുവര്ഷത്തെ പ്രവര്ത്തനം സര്ക്കാര് അധികൃതരുടെ ശ്രദ്ധയില് പെട്ടു. ജില്ലാ കളക്ടര് പറയുന്നു,” അടുത്ത സ്വാതന്ത്ര്യദിനത്തില്, അല്ലെങ്കില് റിപ്പബ്ലിക് ദിനത്തില് സുനിതയെ ആദരിക്കുമെന്ന് ദന്തവാതെ ജില്ലാ കളക്ടര് സൗരഭ് കുമാര് പറഞ്ഞു. സുനിതയെപ്പോലുള്ളവരുടെ നിശ്ചയ ദാര്ഢ്യമാണ് ഇത്തരം ഒറ്റപ്പെട്ട കേന്ദ്രങ്ങളില് ചികിത്സാ സൗകര്യങ്ങള് എത്തിക്കാന് സഹായിക്കുന്നതെന്ന് സൗരഭ് പറഞ്ഞു.
