കൊല്ലം: ജിത്തുജോബ് കൊലക്കേസില് അറസ്റ്റിലായ അമ്മ ജയയെ അന്വേഷണസംഘം കസ്റ്റഡിയില് വാങ്ങി. മാനസികനില പരിശോധിക്കാനും കൂടുതല് ചോദ്യം ചെയ്യാനുമാണിത്. പരവൂര് കോടതിയിലായിരുന്നു അപേക്ഷ നല്കിയത്.
സംഭവവുമായി ബന്ധപ്പെട്ട് സമാന്തര അന്വേഷണം നടത്തുന്നുണ്ട്. ജയയുടെയും കുടുംബാംഗങ്ങളുടേയും വ്യത്യസ്ത മൊഴിയുടെ അടിസ്ഥാനത്തിലാണ് അന്വേഷണം. ചാത്തന്നൂര് എസിപി ജവഹര് ജനാര്ദിന്റെ നേതൃത്വത്തിലാണ് അന്വേഷണം. നാട്ടുകാര് ഉള്പ്പടെയുള്ളവരുടെ ചോദ്യംചെയ്യല് തുടരും. ജയയുടെ മാനസികനില പരിശോധിച്ചതിന് ശേഷമായിരിക്കും വിശദമായ ചോദ്യം ചെയ്യല് നടക്കുക. മാനസികനില പരിശോധിക്കാന് വിദഗ്ധ ഡോക്ടര്മാരുടെ സേവനം ലഭ്യമാക്കിയിട്ടുണ്ട്. ഇവരുടെ റിപ്പോര്ട്ടിന്റെ അടിസ്ഥാനത്തിലായിരിക്കും കേസിന്റെ തുടരന്വേഷണം.
ജയയുടെ മാനസികനിലയില് തകരാറില്ലെന്ന് കണ്ടെത്തിയാല് ശാസ്ത്രീയമായ കുറ്റാന്വേഷണം ആരംഭിക്കും. ഇതിനായി നാര്ക്കോ അനാലിസിസ്, ബ്രെയിന് മാപ്പിങ് തുടങ്ങിയ ശാസ്ത്രീയ അന്വേഷണരീതികള്ക്ക് വിധേയരാക്കും. ഇത് സംബന്ധിച്ച് അന്വേഷണസംഘം ആഭ്യന്തരവകുപ്പിലെ ഉന്നതരുമായി ചര്ച്ചകള് നടത്തിയെന്നാണു സൂചന. പ്രതിയുടെ അറസ്റ്റ് രേഖപ്പെടുത്തുന്നതിന് മുമ്പ് ഇവരുടെ മാനസികനില പരിശോധിച്ചു കുഴപ്പങ്ങളില്ലെന്ന് പോലീസ് സ്ഥിരീകരിച്ചിരുന്നു. ഇവര്ക്ക് മാനസികരോഗമുണ്ടെന്ന് വരുത്തി തീര്ക്കാനുള്ള ബോധപൂര്വമുള്ള ശ്രമങ്ങള് നടക്കുന്ന ആരോപണങ്ങളുടെ പശ്ചാത്തലത്തിലാണ് വീണ്ടും മാനസികനില പരിശോധിക്കുന്നത്.
