മട്ടന്നൂര്: കണ്ണൂര് വിമാനത്താവളം യാഥാര്ത്ഥ്യത്തോട് അടുക്കുമ്പോള് ഭൂമിയും വീടും വിട്ടുനല്കാന് തയ്യാറായ പാറാപ്പൊയില് മേഖലയിലെ 56 കര്ഷക കുടുംബങ്ങളെ 8 മാസം മുമ്പ് വില നിര്ണ്ണയം നടത്തി നഷ്ടപരിഹാരം നല്കാതെ അധികാരികള് വഞ്ചിച്ച് ദുരിതത്തിലാക്കുകയാണെന്ന് കുടിയിറക്ക് വിരുദ്ധ കര്മ്മസമിതി ഭാരവാഹികള് വാര്ത്താ സമ്മേളനത്തില് അറിയിച്ചു.
ലൈറ്റ് അപ്രോച്ചിനായി പാറാപ്പൊയില് മേഖലയില് 8 മാസം മുമ്പ് ഭൂവില നിര്ണ്ണയം നടത്തിയെങ്കിലും സാമ്പത്തിക പരാധീനത പറഞ്ഞ് ഏറ്റെടുക്കല് പ്രക്രിയ നീട്ടിക്കൊണ്ടു പോകുകയാണ് ചെയ്യുന്നത്. വിലനിര്ണ്ണയം നടക്കുമ്പോള് രണ്ടു മാസത്തിനുള്ളില് 56 പേര്ക്കും നഷ്ടപരിഹാരം നല്കുമെന്നും പുനരധിവാസസ്ഥലം അനുവദിക്കുമെന്നും അധികൃതര് വ്യക്തമാക്കിയിരുന്നു. വിളക്കു കാലുകള് സ്ഥാപിക്കുന്ന പ്രവൃത്തി ഉടന് ആരംഭിക്കണം എന്ന് പറഞ്ഞ് ഇതുവരെ രണ്ട് വീടുകള് മാത്രമാണ് ഏറ്റെടുത്തത്. ഇവര്ക്കാകട്ടെ പുതിയ വീട് നിര്മ്മിക്കുന്നത് വരെ വീട്ടുവാടക നല്കുമെന്ന് അറിയിച്ചിരുന്നുവെങ്കിലും അതും പാലിക്കപ്പെട്ടിട്ടില്ല. വിളക്കു കാലുകള് സ്ഥാപിച്ചില്ലെങ്കില് ഉദ്ഘാടനം വൈകുമെന്ന് അധികാരികള് വ്യക്തമാക്കിയതിനാലാണ് ഒരുമിച്ച് ഏറ്റെടുക്കുന്നതിനു മുമ്പ് 2 വീടുകള് ഏറ്റെടുക്കുവാന് കര്മ്മസമിതി സമ്മതിച്ചത്.
പണയപ്പെടുത്തിയ വസ്തുവിന്റെ ആധാരം വീണ്ടെടുത്ത് ബന്ധപ്പെട്ടവര്ക്ക് കൈമാറിയത് പലരും പണം പലിശയ്ക്കെടുത്തും മറ്റുമാണ്. നഷ്ടപരിഹാരം ഉടന് കിട്ടുമെന്ന പ്രതീക്ഷയില് പണം പലിശയ്ക്കെടുത്ത് ആധാരം കൈമാറിയതിനാല് വിവാഹം പോലും മാറ്റിവെയ്ക്കേണ്ട സാഹചര്യം ഉണ്ടായിട്ടുണ്ട്. വില നിര്ണ്ണയം നടത്തിയ വീടുകളും സ്ഥലവും ഏറ്റെടുത്ത് ജനുവരി 10 നകം നഷ്ടപരിഹാരം നല്കാത്ത പക്ഷം ശക്തമായ സമരപരിപാടികളുമായി മുന്നോട്ടു പോകുമെന്ന് ചെയര്മാന് വി.കരുണാകരന്, കണ്വീനര് എ.സദാനന്ദന്, സി.രവീന്ദ്രന്, കെ.രാധാകൃഷ്ണന് എന്നിവര് വ്യക്തമാക്കി.
