മന്ത്രി സുധാകരന്റെ കവിത; ഒക്കെ അയ്യപ്പന്റെ കളിയെന്ന് ജയശങ്കര്‍

കൊച്ചി: റഷ്യന്‍ വിപ്ലവത്തിന്റെ ശതാബ്ദി വേളയില്‍, മാര്‍ക്‌സിനെയോ ലെനിനേയോ പുകഴ്‌ത്തുന്നതല്ലാതെ, ശബരിമല അയ്യപ്പനെ പ്രകീര്‍ത്തിച്ചെഴുതിയ കവിതയുടെ പേരില്‍ മന്ത്രി ജി. സുധാകരന് അഡ്വ. എസ്. ജയശങ്കറിന്റെ വിമര്‍ശനം. കവിത കലിയുഗവരദനായ ഭഗവാന്‍ ശ്രീധര്‍മ്മശാസ്താവിനെ പ്രകീര്‍ത്തിക്കുന്നതാണ്- അതും ഇംഗ്ലീഷില്‍, ‘ഈ മഹാകവി ജി’യെപ്പോലെ എഴുതാന്‍ വേഡ്‌സ്‌വര്‍ത്തിനു പോലും സാധിക്കില്ലെന്ന് ജയശങ്കര്‍ ഫേസ്‌ബുക്കില്‍ എഴുതുന്നു.

പത്തു കൊല്ലം മുമ്പ്, ദേവസ്വം മന്ത്രിയായിരുന്ന സുധാകരന്‍ ശബരിമലയ്‌ക്കു പോയതും ശ്രീകോവിലിനു നേരെ കൈകൂപ്പാഞ്ഞതും ‘അയ്യപ്പ സ്വാമിക്ക് ശക്തിയുണ്ടെങ്കില്‍ ഇയാള്‍ക്ക് പണികിട്ടും’ എന്ന് ആര്‍.ബാലകൃഷ്ണപിളള ശപിച്ചതും അധികം വൈകാതെ ദേവസ്വം വകുപ്പ് കടന്നപ്പളളിക്കു കൊടുത്തതും ഓര്‍മ്മിക്കണമെന്ന് പറയുന്ന ജയശങ്കര്‍, ഒക്കെ അയ്യപ്പ സ്വാമിയുടെ ലീലാ വിലാസങ്ങളാണെന്നും എഴുതുന്നു.

ഫേസ്‌ബുക് പോസ്റ്റ് ഇങ്ങനെ:

മണിയാശാനെപ്പോലെയോ ശൈലജട്ടീച്ചറെ പോലെയോ വെറുമൊരു മാർക്സിസ്റ്റ് മന്ത്രിയല്ല, ജി സുധാകരൻ. കൊല്ലം എസ്.എൻ കോളേജിൽ പഠിച്ച് കേരള സർവകലാശാലയിൽ നിന്ന് ഇംഗ്ലീഷ് എംഎ പാസായിട്ടുണ്ട്. ഷേക്സ്പിയർ, ഷാ, ഗാൽസ്വർത്തി, കീറ്റ്സ്, ഷെല്ലി, ബൈറൻ, ടെനിസൻ ഒക്കെ ബൈഹാർട്ടാണ്.

മരാമത്തു വകുപ്പിലെ ജോലിത്തിരക്കിലും മന്ത്രി കവിത എഴുതുന്നുണ്ട്- മലയാളത്തിലും ഇംഗ്ലീഷിലും. മഹത്തായ റഷ്യൻ വിപ്ലവത്തിന്റെ ശതാബ്ദി ആഘോഷിക്കുന്ന ഈ വേളയിൽ, മന്ത്രിയുടെ പുതിയ കവിത മാർക്സിനെ പറ്റിയല്ല, ലെനിനെ കുറിച്ചുമല്ല. കലിയുഗവരദനായ ഭഗവാൻ ശ്രീധർമ്മശാസ്താവിനെ പ്രകീർത്തിക്കുന്നതാണ്- അതും ഇംഗ്ലീഷിൽ.

The Great Open Secret എന്ന കവിത വിശ്വസാഹിത്യത്തിനു മുതൽക്കൂട്ടാണ്. നോക്കൂ:

“Nature rules the Nature

No rule over the Nature

Who goes above the Nature

Never returns!

He returns to the soil

For he traverses

With the Nature’s pavement

And there is nothing above the Nature”

ഇങ്ങനെ എഴുതാൻ വേഡ്സ് വർത്തിനു പോലും കഴിയില്ല. അതാണ് സഖാവ് സുധാകരൻ. അതുകൊണ്ടാണ് അദ്ദേഹത്തെ മഹാകവി ജി എന്നു വിളിക്കുന്നത്.

പത്തു കൊല്ലം മുമ്പ്, ദേവസ്വം മന്ത്രിയായിരുന്ന സുധാകരൻ ശബരിമലയ്‌ക്കു പോയതും ശ്രീകോവിലിനു നേരെ കൈകൂപ്പാഞ്ഞതും ‘അയ്യപ്പ സ്വാമിക്ക് ശക്തിയുണ്ടെങ്കിൽ ഇയാൾക്ക് പണികിട്ടും’ എന്ന് ആർ ബാലകൃഷ്ണപിളള ശപിച്ചതും അധികം വൈകാതെ ദേവസ്വം വകുപ്പ് കടന്നപ്പളളിക്കു കൊടുത്തതും ഓർമ്മിക്കുക.

ഇപ്പോൾ അതേ അയ്യപ്പ സ്വാമിയെക്കുറിച്ച് സുധാകരൻ എഴുതുന്നു:

“Swami is Guru

Swami is Kin

Swami is the Guide

Swami is the Nature

The Omnipotent

The Omnipresent

And all powerful.”

അയ്യപ്പസ്വാമിയുടെ ഓരോ ലീലാവിലാസങ്ങൾ എന്നല്ലാതെ എന്തു പറയാൻ കഴിയും? സ്വാമിയേ ശരണമയ്യപ്പ!