മുംബൈ: കമല മില്‍സിലെ മൂന്ന് പബുകളിലുണ്ടായ തീപിടുത്തവുമായി ബന്ധപ്പെട്ട് രണ്ട് മാനേജര്‍മാര്‍ അറസ്റ്റില്‍. കെവിന്‍ ബാബ(35), ലിസ്ബണ്‍ ലോപ്‌സ്(34) എന്നിവരാണ് അറസ്റ്റിലായത്. ഇവരെ ചോദ്യം ചെയ്ത് വരികയാണെന്ന് പോലീസ് വ്യക്തമാക്കി.
അറസ്റ്റിലായ മാനേജര്‍മാര്‍ അപകടം നടന്ന സമയത്ത് സ്ഥലത്തുണ്ടായിരുന്നുവെങ്കിലും അതിഥികളെ സഹായിക്കാന്‍ നില്‍ക്കാതെ ഓടി രക്ഷപ്പെടുകയായിരുന്നുവെന്ന് പോലീസ് പറഞ്ഞു. എന്നാല്‍ കേസിലെ പ്രധാന പ്രതികളും കെട്ടിട ഉടമകളുമായ ഹിതേഷ് സാംഗ്വി, ജിഗാര്‍ സാംഗ്വി, അഭിജിത്ത് മങ്കാര്‍ എന്നിവരെ ഇതുവരെ പിടികൂടാന്‍ പോലീസിന് കഴിഞ്ഞിട്ടില്ല. ഇവര്‍ക്ക് വേണ്ടിയുള്ള അന്വേഷണം ഊര്‍ജ്ജിതമായി തുടരുകയാണ്.
ലോവര്‍ പരേലിലെ പ്രധാന വാണിജ്യ സമുച്ചയമായ കമല മില്‍സില്‍ ഡിസംബര്‍ 29നാണ് തീപിടുത്തം ഉണ്ടായത്. 14 പേരാണ് സംഭവത്തില്‍ മരിച്ചത്. നിരവധി പേര്‍ക്ക് പരിക്കേറ്റിരുന്നു. ഇപ്പോഴും പലരും ആശുപത്രിയില്‍ ചികിത്സയിലാണ്. രാത്രി 12.30ഓടെയാണ് നാലുനില കെട്ടിടത്തിന്റെ ടെറസിനു മുകളില്‍ കെട്ടിയുണ്ടാക്കിയ അറകള്‍ക്ക് തീപിടിച്ചത്. സ്‌ഫോടന ശബ്ദത്തോടെ തീ അതിവേഗം പടരുകയായിരുന്നു. വണ്‍ എബൗ, മൊജൊ ബിസ്‌ട്രൊ അടക്കം മൂന്ന് പബുകളിലാണ് തീപടര്‍ന്നത്.
അപകടത്തെ തുടര്‍ന്ന് വണ്‍ എബൗ ഉടമകളും സഹോദരന്മാരുമായ ഹിതേഷ് സാങ്‌വി, ജിഗര്‍ സാങ്‌വി എന്നിവര്‍ക്കും മറ്റൊരു ഉടമ അഭിജിത് മങ്കക്കും എതിരെ കേസെടുത്തിട്ടുണ്ട്. സാങ്‌വി സഹോദരന്മാര്‍ക്കെതിരെ ലുക്കൗട്ട് നോട്ടീസ് ഇറക്കുകയും ചെയ്തു. സംഭവവുമായി ബന്ധപ്പെട്ട് 27 സാക്ഷികളുടെ മൊഴി പൊലീസ് രേഖപ്പെടുത്തിയിരുന്നു.
