കല്പ്പറ്റ: പ്രശസ്തമായ വയനാട് വന്യജീവിസങ്കേതത്തില് കരിങ്കഴുകന്റെ (സിനേറിയസ് വള്ചര്) സാന്നിധ്യം സ്ഥിരീകരിച്ചു. തോല്പ്പെട്ടി റെയിഞ്ചിലെ നായ്ക്കട്ടി വനത്തിലാണ് കഴിഞ്ഞദിവസം കരിങ്കഴുകന്റെ സാന്നിധ്യം കണ്ടെത്തിയത്. കണ്സര്വേറ്റ് ബയോളജിസ്റ്റ് ഒ വിഷണുവും ക്യാമറ ട്രാപ്പ് മോണിറ്ററിംഗ് ടീം അംഗങ്ങളായ ടി.എം ദിവാകരന്, എ ദിനേശന് എന്നിവരടങ്ങുന്ന സംഘമാണ് ഇതിനു പിന്നില് പ്രവര്ത്തിച്ചത്.
ചുവപ്പുതലയന്, കാതില കഴുകന് എന്നിവയുടെ ആവാസ വ്യവസ്ഥയാണ് വയനാട് വന്യജീവിസങ്കേതം. തോല്പ്പെട്ടി, കുറിച്യാട്, മുത്തങ്ങ എന്നിവിടങ്ങളിലാണ് കഴുകന്മാരെ കണ്ടുവരുന്നത്. മുന്പ് ചുട്ടികഴുകനെയും ഇവിടെ കണ്ടെത്തിയിരുന്നു.
ഈ ആവാസവ്യവസ്ഥയിലാണ് ആദ്യമായി കരിങ്കഴുകന്റെ സാന്നിധ്യം റിപ്പോര്ട്ട് ചെയ്തിരിക്കുന്നത്. വംശനാശ ഭീഷണിയിലായ ഈജിപ്ഷ്യന് കഴുകനെയും, ഹിമാലയന് ഗ്രിഫോണ് കഴുകനെയും വയനാട് വന്യജിവസങ്കേത്തില് മുമ്പ് കണ്ടെത്തിയതായി റിപ്പോര്ട്ട് ചെയ്തിട്ടുണ്ട്. സാധാരണയായി രാജസ്ഥാന് അടക്കമുള്ള സ്ഥലങ്ങളിലാണ് കരിങ്കഴുകന്റെ ആവാസവ്യവസ്ഥ.
ശൈത്യകാലങ്ങളില് തെക്കേഇന്ത്യയിലേക്ക് ദേശാടനം നടത്താറുണ്ടങ്കിലും എവിടെയും സാന്നിധ്യം റിപ്പോര്ട്ട് ചെയ്തിട്ടില്ല. പര്വ്വതശൃംഗങ്ങളില് കൂട്കൂട്ടി കഴിയുന്നവയാണ് കരിംകഴുകന്. വയനാട് വന്യജീവിസങ്കേതത്തില് കരിങ്കഴുകന്റെ സാന്നിധ്യം റിപ്പോര്ട്ട് ചെയ്യപ്പെട്ടങ്കിലും കൂടുതല് പഠനം നടത്തണമെന്നും സാന്നിധ്യം ഉറപ്പുവരുത്തുന്നതിന്നായി മൃഗശരീരാവശിഷ്ടങ്ങള് കൃത്യമായി മോണിറ്റര് ചെയ്യുമെന്നും വനംവകുപ്പ് അധികൃതര് അറിയിച്ചു.
കഴുകന് വര്ഗത്തില്പെട്ട പക്ഷികളുടെ സംരക്ഷണത്തിന്നായി മുന് വര്ഷം കേന്ദ്രപരിസ്ഥിതി മന്ത്രാലയം 50 ലക്ഷം രൂപ വകയിരുത്തിയിട്ടുണ്ട്. ഇതില് ആദ്യഗഡുവായ 30 ലക്ഷം ഈ വര്ഷം ലഭ്യമാകും. തുക ലഭിക്കുന്നതോടെ അവശേഷിക്കുന്ന കഴുകവംശത്തില്പെട്ട പക്ഷികളുടെ സംരക്ഷണ പ്രവര്ത്തനങ്ങള് ശക്തമാക്കും.
