മറയൂര്: മൂന്നാര് വൈല്ഡ് ലൈഫ് ഡിവിഷനിലെ ചിന്നാര് വന്യജീവി സങ്കേതം പുതുവത്സര ദിനം മുതല് ജീപ്പ് സഫാരി ഒരുക്കുന്നു.മറയൂര് ഹെറിറ്റേജ്സഫാരി എന്ന് പേരിട്ടിരിക്കുന്ന പദ്ധതി മൂന്നാര് വൈല്ഡ് ലൈഫ് വാര്ഡന് ആര്. ലക്ഷ്മി ഉദ്ഘാടനം നിര്വഹിക്കും. മറയൂരില് വനം വകുപ്പ് സംഘടിപ്പിക്കാനായി തയ്യാറെടുക്കുന്ന ട്രൈബല് ഫുഡ് ഫെസ്റ്റിന്റെ മുന്നോടിയായി ആലാംപെട്ടിയില് എത്നിക്കഫേയുടെ അടുക്കളയുടെ ഉദ്ഘാടനവും നിര്വഹിക്കും. ഉദ്ഘാടന ചടങ്ങില് ചിന്നാര് അസി.വൈല്ഡ് ലൈഫ് വാര്ഡന് പി.എം. പ്രഭുഅദ്ധ്യക്ഷത വഹിക്കും.
മറയൂരില്നിന്ന് യാത്ര ആരംഭിക്കുന്ന തുറന്ന ജീപ്പില് ആറുപേര്ക്കാണ്മറയൂരിന്റെ വൈവിധ്യങ്ങളിലേക്ക് ഒരേ സമയത്ത് യാത്ര ചെയ്യാന് കഴിയുന്നത്. മറയൂര് ചന്ദന റിസര്വ്വിനുള്ളിലെപത്തിപ്പാറയിലെ എഴുത്തള, മുനിയറകള്,സാംസ്കാരികപൈതൃകഗ്രാമങ്ങളായ അഞ്ചുനാട് ഗ്രാമങ്ങളില് ഒന്നായാ മറയൂര് ഗ്രാമവും വീരക്കല്ലും, മധുരം വിളയിക്കുന്ന കര്ഷകരുടെ മറയൂര് ശര്ക്കര നിര്മ്മാണം, കീഴാന്തൂരില് നിന്നുള്ള മറയൂരിന്റെ ദൂരക്കാഴ്ച്ച, കേരളത്തിന്റെ പൈതൃക സ്വത്തായ ചന്ദനക്കാടുകള്, ഗോത്ര ജനതയുടെസാംസ്കാരിക ഘടന നേരിട്ടറിയുന്നതിനായി വില്ലേജ് ടൂറിന്റെ ഭാഗമായി കാന്തല്ലൂരില് കുളച്ചിവയല് വനവാസി കുടി സന്ദര്ശനം, കേരളത്തിലെ പഴവര്ഗ്ഗങ്ങളുടെ കലവറയായകാന്തല്ലൂരിലെ ആപ്പിള്, ഓറഞ്ച് തോട്ടങ്ങള് എന്നിവയാണ് ആറുമണിക്കൂര് യാത്രയില് ഉള്പ്പെടുത്തിയിരിക്കുന്നത്.
