നെടുങ്കണ്ടം: പാമ്പാടുംപാറ ആദിയാര്‍പുരം മുണ്ടിയെരുമ റോഡിന്റെ പേരില്‍ ഇടതുവലത് മുന്നണികള്‍ രാഷ്ട്രീയം കളിക്കുന്നു, വലഞ്ഞ് പൊതുജനം. കോളനി നിവാസികള്‍ ഉള്‍പ്പടെ മുന്നൂറോളം കുടുംബങ്ങള്‍ താമസിക്കുന്ന മേഖലയില്‍ റോഡിന്റെ അപര്യാപ്തത പ്രദേശവാസികള്‍ക്ക് ബുദ്ധിമുട്ട് സൃഷ്ടിക്കുന്നു. കുടിയേറ്റ കാലത്തോളം പഴക്കമുള്ള റോഡ് ആണ് ഇത്. പ്രദേശവാസികള്‍ക്ക് മറ്റ് സ്ഥലങ്ങളിലേക്ക് എത്തിച്ചേരുന്നതിനുള്ള ഏക ആശ്രയവും ഇതാണ്. എന്നാല്‍ റോഡിന്റെ തുടക്കത്തിലുള്ള 800 മീറ്റര്‍ ഭാഗം വര്‍ഷങ്ങളായി കാല്‍നടയാത്ര പോലും പറ്റാത്ത നിലയില്‍ കുണ്ടുംകുഴിയുമായി കിടക്കുകയാണ്.
പാമ്പാടുംപാറ ഏലം ഗവേഷണ കേന്ദ്രത്തിന്റെ അധീനതയിലുള്ളതാണ് ഈ സ്ഥലം. ഈ ഭാഗം പഞ്ചായത്തിന് വിട്ടുനല്‍കണമെന്ന് ആവശ്യപ്പെട്ട് പലതവണ ബന്ധപ്പെട്ടവര്‍ക്ക് നിവേദനങ്ങള്‍ നല്‍കിയിട്ടും ഫലം ഉണ്ടായിട്ടില്ല. കാര്‍ഷിക സര്‍വ്വകലാശാലയുടെ പ്രതിനിധികള്‍ ഇവിടെയെത്തി സ്ഥലം വിട്ടുനല്‍കാമെന്ന് ഉറപ്പ് നല്‍കി മടങ്ങിയിട്ടും നടപടികള്‍ ഉണ്ടായില്ല എന്നാരോപിച്ച് കോണ്‍ഗ്രസും, എന്നാല്‍ എംഎല്‍എയുടെ ഇടപെടലിനെ തുടര്‍ന്ന് ഈ സ്ഥലം ഏലം ഗവേഷണ കേന്ദ്രം വിട്ടു നല്‍കിയെന്ന് അവകാശ പെട്ട് സിപിഎമ്മും രംഗത്ത് വന്നിരിക്കുന്നു. ഇവരുടെ രാഷ്‌ട്രീയ നാടകം അവസാനിപ്പിച്ച് സഞ്ചാരയോഗ്യമായ റോഡ് നിര്‍മ്മിക്കണമെന്നതാണ് നാട്ടുകാരുടെ ആവശ്യം.
